Libros, poesía, tradición, teatro e exposicións en Malpica polas Letras Galegas
Días de vertixe cultural en Malpica co gallo do programa municipal das Letras Galegas. Estes días xa os centros educativos e a Biblioteca Municipal de Malpica están recibindo novos libros relativos ao escritor homenaxeado no Día das Letras Galegas 2022, Florencio Delgado Gurriarán. A concelleira de Educación, Cultura, Patrimonio e Deportes, Noelia Freijeiro, foi a encargada de facer a entrega de moitos exemplares de “Os Bolechas. As miñas primeiras Letras” e “Florencio Delgado Gurriarán. Polos vieiros da saudade", asinado por Héctor Cajaraville.
As publicacións entregadas na Biblioteca Municipal compartirán estes días, ata o 31 de maio, espazo coa exposición en torno á obra do poeta nacido na aldea Córgomo, no concello ourensán de Vilamartín de Valdeorras.
Cea das Letras
Ademais este venres, 13 de maio, presentarase a obra gañadora do XVI Certame de Poesía Erótica “Illas Sisargas”: Edénicas de Andrea Fernández. Será ás 19.00 horas, na Casa do Pescador, nun acto organizado pola A.C. Caldeirón no marco da Cea das letras.
Muiñada
E o sábado 14 está programado un evento lúdico coa representación de Muiñada, a cargo da ompañía Galeatro. Ao remate os asistentes terán a posibilidade de realizar unha visita guiada pola contorna da Área Recreativa de Río de Vaa. Para os interesados a entrada será de balde, sendo unicamente preciso inscribirse antes do comezo da actividade, ás 17.30 horas.
Exposición e teatro
Xa o martes 17 de maio, inaugurarase o novo espazo expositivo “Non canto por cantar” no Centro de Artesanía e Tradición (antigo Centro Comarcal de Bergantiños). As 12.00 horas abrirá as portas a mostra que reúne imaxes gráficas e documentación na que se fai un percorrido pola historia da música e baile tradicional de Galicia e que aínda se mantén vivo a través das actuacións dos mozos e mozas. O acto contará coa participación das asociacións locais Raigañas, Malante e Carcaxía que interpretarán pezas do Concello de Malpica.
Ademais, o mesmo martes 17, ás 17:00h, acolle unha representación da vida de Rosalía a través dunha obra de teatro homónima representada pola compañía Culturactiva Producións.
A programación do día 17 complétase ás 18.30 está previsto o concerto de música infantil: Charo Pita co espectáculo A familia Papaventos, na praza Anselmo Villar Amigo.