Mazaricos traslada ao Parlamento os cortes de luz que sofre a veciñanza, o sector gandeiro e o tecido produtivo
O alcalde de Mazaricos, acompañado pola deputada Rosana Pérez e polo deputado Xosé Manuel Golpe (portavoz de enerxía e minas no Parlamento de Galicia) do grupo parlamentario do BNG, visitaron a pasada mañá do venres unha explotación gandeira do concello para coñecer de primeira man as graves consecuencias que están a provocar os continuos cortes no subministro eléctrico.
Juan Blanco quixo explicarlle en primeira persoa á deputada a situación insostible que vive a veciñanza, tecido empresarial e o sector gandeiro, xa que dende o pasado mes de xullo, veñen sufrindo centos de microcortes eléctricos que están a causar estragos na vida cotiá da veciñanza, do tecido empresarial, e de xeito especialmente grave, nas explotacións gandeiras. En xornadas recentes rexistráronse máis de 40 cortes nun só día, chegando a producirse ata 28 interrupcións en menos de tres horas nalgúns pasos. Unha calamidade para o primeiro produtor de leite de Galicia, que conta con 150 explotacións de gando bovino e máis de 12.000 vacas de leite, xestionadas a meirande parte nunha industria totalmente innovadora e electrodependente.
Moitas familias gandeiras víronse obrigadas a mercar grupos electróxenos de gasóleo, mais estes non sempre teñen potencia abonda para garantir o funcionamento correcto dos robots de muxido e demais maquinaria esencial.
Despois do acordo municipal dos tres partidos, o Concello vai un paso máis e presentará varias iniciativas parlamentarias ao Parlamento de Galicia para que a Xunta exerza as súas competencias en materia enerxética e obrigue á empresa distribuidora a solucionar os problemas de subministro con carácter urxente.
O Concello xa leva en comunicación constante cos responsables territoriais de UFD Distribución, titular das liñas, para axilizar as reparacións e reclamar solucións permanentes e adaptar as liñas subministradoras ás necesidades actuais de Mazaricos. Ademais, mantivo unha Xuntanza co Delegado Provincial de Industria: O concello celebrou unha reunión coa Delegación Provincial de Industria da Xunta de Galicia para trasladar as queixas veciñais e esixir a intervención da administración autonómica.
Non vai quedar aí a cousa e van esixir á Xunta que exerza as súas competencias de inspección e sanción sobre as empresas distribuidoras en caso de incumprimento dos estándares de calidade do subministro. "Non é admisible que a veciñanza dun concello que soporta o peso da produción enerxética para abastecer ao resto do Estado continúe sufrindo o abandono das infraestruturas e a falta de mantemento por parte da empresa distribuidora", sinala o rexedor.