A gran tempada a nivel deportivo e social da familia do ACB Costa da Morte
Gran tempada a que está a desenvolver a familia do ACB Costa da Morte tanto a nivel social como deportivo. Con 5 equipos en competición (un premini mixto, un infantil mixto, cadete mixto e dous senior masculino) o equipo ceense con alma comarcal (como reza a C do acrónimo) está nun gran momento de saúde. C máis de 110 fichas, 4 adestradores está completando un curso de formación e valores, como o demostraron a pasada fin de semana nos partidos solidarios 'Canastas Contra o Cáncer Infantil’.
En canto ás competicións, o equipo Premini, adestrado por Uxía Felpete. participa na liga A. D. As Rías na zona do Barbanza, organizada por Xogade. O equipo está formado por 8 nenos e nenas de entre os 7 e os 11 anos de idade, todos eles con un ou dous anos de experiencia no baloncesto.
O equipo rematou a liga regular este mes de marzo na 5ª posición con un balance de 1 vitoria e 9 derrotas. Durante o próximo mes de abril xogará contra o equipo ANPA O Grupo (Ribeira) un playoff polo quinto posto.
Pola súa banda, o equipo infantil mixto (na imaxe superior, con rapaces e rapazas de 12 a 14 anos) está adestrado por Manuel Vázquez que, ademais deste equipo leva a dirección deportiva do club e os equipos cadete mixto e senior masculino blanco.
Este é o segundo ano deste equipo na 2ª División da Federación Galega e rematou a fase de inverno con equipos da Coruña no 6º posto (dun total de 30 equipos) cun balance de 6 vitorias e 2 derrotas, quedando ás portas da fase de ascenso a liga galega. Agora, na fase regular está a competir no grupo A-1 cos mellores equipos da liga onde leva un balance de 0 vitorias e 5 derrotas, estar neste grupo asegúralle un posto entre os 8 primeiros na clasificación final.
O equipo cadete masculino 14-16 anos), dirixido tamén por Manuel Vázquez, está no seu primeiro ano na categoría e rematou a fase de inverno no 10º posto (dun total de 27 equipos) cun balance de 4 vitorias e 4 derrotas.
Agora, na fase de inverno, tamén con equipos herculinos, está a competir no grupo A-2 e leva 0 vitorias e 4 derrotas ata agora, perdendo varios partidos por pouca diferenza.
Dous equipos sénior
O bo traballo de canteira destes anos pasados obrigou ao club a sacar dous equipos sénior. O equipo senior masculino negro está dirixido por Ramón Trillo e os seus xogadores son todos debutantes na complicada 3ª División Masculina. Remataron a fase regular no último posto, unha vez que non puideron estrear o taboleiro de vitorias, pagando a xuventude e a inexperiencia na categoría.
No mes de abril xogará un playoff polas posicións do 25º ao 30º posto para determinar as posicións finais da clasificación.
Mentres, o equipo senior masculino blanco, tamén dirixido por Manuel Vázquez, está composto por xogadores entre os 20 e os 50 anos, moitos de eles cunha amplia experiencia na competición e neste deporte.
Remataron a liga regular no 5º posto do seu grupo con un balance final de 8 vitorias e 10 derrotas.
No mes de abril xogará un playoff polas posicións do 9º ao 16º posto para determinar as posicións finais na clasificación.
Tanto o senior masculino negro como o blanco compiten contra equipos de Coruña, Ferrol e Lugo.
Adestramentos abertos e inclusivos
O club ofrece ademais unha actividade dirixida tanto a pais e nais do club, como a xente adulta que non quere competir, que ten preto de 20 inscritos e que adestran baixo as orden de Carlos Rodeiro os luns e os mércores pola noite.
E tamén, os sábados pola mañá fai uns adestramentos dirixidos a algúns dos alumnos da asociación ASPADEX para que fagan deporte e coñezan o baloncesto.
Ademais de todo isto, o club conta cun estupendo e exitoso campus de verán e un torneo de 3x3 no mes de agosto.