14 espectáculos encherán o auditorio de Vimianzo de xaneiro a maio

Volve facer o Concello de Vimianzo gala da súa aposta pola programación continua para encher de vida o Auditorio da Casa da Cultura. Vén de presentar o progframa para os vindeiros 6 meses, con 14 espectáculos que permitirán seguir situando a vila soneirá como unha das capitais culturais da comarca. 

Este primeiro semestre de 2026 terá música, danza, teatro e maxia, que protagonizarán as citas dun amplo abano de iniciativas financiado pola Rede Galega de Teatros e Auditorios da Xunta de Galicia, o Centro Dramático Galego e a Rede Cultural da Deputación da Coruña. 

Abrirá o exercicio Antonio Barros e a banda de mulleres galegas de centro europa, IAlma co recital "Unha viaxe polas grandes voces da canción española”. Será o 18 de xaneiro e a venda de entradas, como de costume, será na Casa da cultura de luns a venres de 9:30 a 14:30 horas e unha hora antes de cada espectáculo. 

Debullamos o resto da programación aquí: 

• 24 de xaneiro, a comedia cómica “Entre dos” protagonizada por  Teté Delgado e Julio Pereira.
• 30 de xaneiro, o Centro dramático Galego achega a Vimianzo a estrea “Memorias dun neno labrego”.
• 7 de febreiro, concerto da vimiancesa Gala Cernadas e Ernesto Alemán de violín e piano “Ecos do tempo”.
• 2o de febreiro, estrea de Nortear da compañía Columna Balteira, residencia artística no Auditorio de Vimianzo. Nortear é unha peza escénica onde o espectral se confunde co real, o poliítico co onírico, o etnográfico co poético.
• 7 de marzo, teatro do Noroeste achega a Vimianzo a súa última produción “Manual de patronaxe”.
• 14 de marzo, Contraproducións   “Yo no quiero irme a Francia” a  recoñecida  actriz María Galiana.
• 21 de marzo, Mago Teto.
• 28 de marzo, o 8º  Festival folclórico Foliada do Río Grande que organizan os grupos de danza tradicional Airiños do Río Grande e  a Foliada de Salto en colaboración co Concello de Vimianzo.
• 11 de abril, a compañía Trifásico teatro achega o espectáculo “Vento metal”, un cóctel perfecto de comedia, absurdo, intimidade, delicadeza e un toque de grotesco. No elenco a vimiancesa natural de Carantoña Jéssica Canosa.
• 18 de abril, Os Naufragos Teatro achega a súa última produción Riazor Ostia que  é un poema escénico sobre o odio, a intolerancia e a resistencia. Cincuenta anos despois do asasinato de Pier Paolo Pasolini, a súa voz e o seu corpo seguen a interpelarnos, amosándonos feridas aínda abertas. 
• 25 de abril, a compañía Malasombra con  “O asombro”. Cándido Pazó constrúe unha peza teatral que, en ton de sainete cómico protagonizado por unha galería de personaxes populares do Ourense de finais do XIX.
• 2 de maio. Transeúnte é un espectáculo coproducido polo Centro Coreográfico Gallego. Neste brilla en directo o diálogo entre a música, o canto, a danza tradicional e a danza contemporánea.  

Entradas adicionais 

Para Maruxiña e Facendo o indio as entradas poderanse adquirir en woutick.es cun prezo de 3 euros. As de Inherente, a un prezo de 13,26 euros en entradium.com e para Blippi y sus amigos en entradas.vigoplam.com a un prezo de 13 euros. 

Máis información en www.vimianzo.gal.