Destacan as obras realizadas co case 1 millón de euros que o POS da Deputación deixou no Concello de Cabana

A deputada de plans provinciais e asistencia a municipios, Cristina García Rey, visitaba onte o concello de Cabana para revisar e poñer en valor algunhas das obras financiadas co Plan Único, que este ano destinou un total de 933.743€€ a este concello.

Acompañada do alcalde, José Muíño; o concelleiro de obras, Carlos Allo, e a concelleira do BNG Tatiana Rellán, a deputada salientou a importancia do Plan Único “especialmente para os concellos máis pequenos, con excesivas e impropias competencias municipais, que dificilmente poden afrontar”.

Ademais, tal e como expuxo a deputada, o Plan Único “supón un importante impulso para a economía local, ao fomentar a contratación de pequenas e medianas empresas de construción, enxeñerías e outras de sectores relacionados. Deste xeito, ademais de asegurar a execución de obras necesarias, tamén se fortalece o tecido empresarial local, xéranse oportunidades de emprego e contribúese a fixar poboación”.