Un concerto de corais abrirá un programa de Nadal en Cabana que vai polas parroquias

O concerto As Nosas Músicas abrirá a programación de Nadal do Concello de Cabana de Bergantiños que dará comezo o vindeiro domingo 19 de decembro e se estenderá ata a noite máxica de Reis do día 5 de xaneiro. A cita As Nosas Músicas deste domingo 19 de nadal xa vén sendo tradicional no tempo de inverno cabanés. Nesta ocasión, subirán ó escenario do Auditorio Municipal, a partir das 6 da tarde, as tres corais radicadas no municipio acompañadas por parte do alumnado da Escola Municipal de Música José Mª Álvarez Canto. Romperán o xeo, os gaiteiros Iván Lema e Jordi Castro coa interpretación dunha “Polca”. A continuación, a coral San Martín de Canduas, fundada polo crego Antonio Méndez Farto, recentemente premiado coa medalla Marcial del Adalid, cantará os temas “O consolo”, “Ai la le lo” e “Revive la Navidad”. A segunda coral será a Asociación de Homes e Mulleres Coro de Cesullas a cal, baixo a dirección de Teresa Facal Amado, subirá ás taboas os temas “A branca gaivota”, “Durme, Xesús, durme” e “Ledicia no mundo”. O peche coral corresponderalle a Homes e Mulleres Coral de Corcoesto os cales, baixo a batuta de Jesús Couto Varela, interpretarán “Unha terra, un pobo, unha fala”, “A estrela” e “Galicia ó compás dunha muiñeira”. A clausura definitiva correrá a cargo do Grupo de Iniciación á Música da Escola Municipal coa interpretación colectiva da canción televisiva “O pirimpimpín”. Non obstante, ó longo da tarde, unha das corais presentará unha sorpresa vinculada co repertorio tradicional de Cabana de Bergantiños, segredo que se desvelará no propio concerto.

O Nadal vai por parroquias

Unha das características desta programación invernal será que, fiel á filosofía do traballo realizado desde o Departamento de Cultura, percorrerá a totalidade das parroquias do concello. Así, xa desde a propia mañá do domingo 19 comezarán as representacións de belén viventes. O domingo 19, serán as representacións de Borneiro e Canduas. O sábado 25 de decembro, as de Corcoesto, Neaño, Anos, Cesullas e Riobó. O domingo 2 de xaneiro, as do Esto e Cundíns. Estas representacións realizaranse, segundo costume, nas igrexas parroquiais ou nalgún local social. En Anos e en Cundíns, o Concello conta coa colaboración da asociación de veciños e cos asistentes ó catecismo.

Cabalgata de Reis

Outro ano máis, a Cabalgata de Reis tamén acudirá a todas as parroquias. Como na pasada edición, os Reis levarán ledicia e regalos a todos montados nun tren pneumático. O luns 5 de xaneiro percorrerán A Silvarredonda, Corcoesto, Beres, O Esto, Cundíns e Cesullas. O martes 6 de xaneiro irán a Borneiro, Canduas, Neaño, Anos, A Mata e Nantón. En Nantón haberá un belén de Reis organizado pola Asociación Cultural Airiños de Nantón. A cita máis concorrida será a do día 5 de xaneiro, a partir das 6 e media da tarde, na Noite Máxica de Reis, que terá lugar no pavillón municipal. Para os máis pequenos abrirase Cabanalandia con inchables, obradoiros infantís e xogos de Wii. Mentres se agarda pola chegada dos Reis Magos, todos poderán gozar dunha actuación de maxia a cargo de Pablo Trasno.

Novas relacionadas

• A canto sae un ferrado na Costa?.

Fonte

• Nota de prensa do Departamento de Cultura do Concello de Cabana.