Cine árabe, humor e exposición para a axenda carballesa

Fin de semana movida por Carballo, co ciclo de cine árabe AMAL en Ruta, o comezo dos Venres Culturais e a inauguración da exposición do Día da Nena e a Muller na Ciencia.

Xoves de cine árabe: AMAL

A axenda cultural en Carballo arrinca este xoves ás 20:00h no auditorio do Pazo da Cultura coa proxección do ciclo de cine euroárabe AMAL en ruta, promovido pola Fundación Araguaney – Ponte de Culturas. Nesta quenda o filme é unha longametraxe de ficción titulada “The Old Oak”. Unha agarimosa película que narra como un pub irlandés dos de toda a vida nunha pequena vila do noroeste de Inglaterra, acaba convertíndose nun centro social de refuxiados sirios. Todo da man dun dos grandes mestres do cine social como é o director Ken Loach.

Venres Culturais: Butaca Zero

Os Venres Culturais de Cultura con Forza comezan este mes de febreiro coa interesante proposta teatral da compañía galega ButacaZero titulada “O único que verdadeiramente quixen na vida é ser delgada”. Cunha sinceridade crúa, neste texto de auto[NON]ficción, a autora Esther F. Carrodeguas aborda a relación co seu corpo, marcada pola gordofobia que se respira en calquera pequena esquiniña desta nosa apaixonante sociedade da fermosura.
Carrodeguas é unha rianxeira de pura cepa que asenta o seu currículo vital entre as letras, o audiovisual e o teatro.

A cita é o venres 7 de febreiro ás 21.00 horas no Pazo da Cultura. A duración prevista do espectáculo, dirixido a público adulto, é de 55 minutos. O prezo da entrada é de 5 €, 3 € con prezo reducido. Colabora a Rede Galega de Teatros e Auditorios.

Exposición das Mulleres Guerreiras Investigadoras

O sábado 8 ás 12:00 terá lugar ás 12:00h a inauguración na rúa Coruña, na Praza do Concello, da exposición que levar por título "Mulleres guerrilleiras: investigadoras de Carballo”.

Exposición de Loli España

Por último, continúa aberta ao público a exposición “O son do nordés”, da artista plástica vinculada a Carballo Loli España. Pode visitarse até o 28 de febreiro en horario de 17.00 a 21.00 horas na sala do andar -1 do Pazo da cultura. Organiza a Concellaría de Cultura.