O PP pon en valor o novo Centro Integral de Saúde de Carballo

“O novo centro integral de saúde de Carballo vai supor un salto cualitativo na atención e consolidar o municipio como referente sanitario da comarca de Bergantiños”. Así se referiu esta fin de semana Rubén Lorenzo sobre o futuro CIS. 

O deputado e voceiro do PP carballés visitou os terreos que albergarán a futura infraestrutura sanitaria, xunto á parlamentaria Carmen Pomar, para poñer en valor o compromiso do Goberno galego con “este proxecto estratéxico”, para o que se destinará un investimento de 12M€, reforzando de forma notable a capacidade asistencial de toda a comarca. Segundo trasladou a deputada popular, o futuro CIS permitirá albergar servizos de gran demanda como o de diálise, evitando o desprazamento dos pacientes varias veces por semana ata a cidade da Coruña. Así mesmo, incorporará unha área integral da muller e de saúde mental, e a integración da unidade de condutas aditivas que, na actualidade, atende a 500 pacientes.

Rubén Lorenzo recordou que foi “o PP de Carballo o primeiro e o único en defender a creación dun CIS no municipio”. Así, referiuse á moción, presentada no 2011, na que se pedía a transformación do centro de saúde nun CIS para dar servizo aos 60.000 veciños da comarca. E afeou a postura de nacionalistas e socialistas que, en lugar de apoiar a solución máis eficaz, preferiron avogar por un segundo centro de saúde. “O sinsentido do BNG e do PSdeG chegou a solicitar a división da atención sanitaria en dous edificios distintos, separados por un quilómetro de distancia”, indicou.