A valorización do patrimonio mariñeiro centra a xornada celebrada na Casa do Mar de Lira
O pasado 22 de outubro, entre as 17:00 e as 20:30 horas, celebrouse na Casa do Mar de Lira unha xornada dedicada á posta en valor do patrimonio mariñeiro e litoral, no marco do proxecto Temporada de Mar. A actividade, organizada pola Asociación Profesional de Técnicos de Cultura de Galicia (APTCM) co apoio do Concello de Carnota, reuniu representantes do sector cultural, patrimonial e turístico da comarca.
Unha xornada que serviu para incidir en que a asunción de competencias por parte da Xunta de Galicia na xestión do litoral representa unha gran oportunidade para as localidades costeiras. "A existencia dun marco regulador que combine control e flexibilidade podería facilitar a recuperación e conservación do patrimonio marítimo galego, impulsando ao mesmo tempo o desenvolvemento cultural e turístico das comunidades mariñeiras", aseguran dende APCTM.
O encontro comezou cunha visita guiada á Caseta de Pepe do Cuco, en Lira, da man de María Lago González, técnica de turismo do Concello de Carnota.
Posteriormente, a actividade trasladouse á Casa do Mar, onde tivo lugar unha mesa de intervencións con destacados expertos e representantes institucionais. Pepe Formoso, presidente da APTCM, e o alcalde de Carnota Juan Manuel Saborido, seron a benvida.
Tomou a palabra a actriz fisterrá Mariña Lestón, coñecida pola súa obra “Costa da Morte, cartografía dun naufraxio”, subliñou a importancia do patrimonio inmaterial e da tradición oral na construción da identidade cultural. Explicou o proceso de recollida de historias e cantigas populares, así como o respecto polas variantes dialectais nas súas representacións teatrais.
Manuel Lara Coira, presidente de Buxa, Asociación Galega do Patrimonio Industrial, animou a visitar o inventario patrimonial
dispoñible na web da entidade. Reivindicou a necesidade de crear sinerxías entre o patrimonio inmoble, moble e inmaterial, e
destacou o papel das mulleres como base do benestar e da transmisión cultural.
E finalmente o investigador Santiago Llovo Taboada, experto no patrimonio marítimo da Costa da Morte, fixo un repaso polos principais
elementos patrimoniais da zona, desde peiraos e faros ata as numerosas fábricas de salga, auténticos testemuños da economía tradicional do litoral.
Máis novas