Abren un proceso participativo co tecido empresarial para o Plan Turístico Xallas-Pindo
Coñecíamos hai apenas un par de semanas o ambicioso Plan de Sustentabilidade Turística en Destino (PSTD) que une o río Xallas co Monte Pindo. Un proxecto da Deputación da Coruña para acceder aos fondos Next Generation que engloba aos concellos de Santa Comba, Carnota, Dumbría, Mazaricos e Zas.
Neste marco, os impulsores están realizando unha campaña participativa para obter a opinión dos sectores produtivos e sociais dos territorios afectados, para afiar o proxecto e contribuir “a xerar un turismo máis sostible, resiliente e competitivo para este destino, vertebrado a partir do aproveitamento responsable dos seus recursos hídricos máis singulares, tanto de costa como de interior: praias-mar, ríos, encoros, fervenzas e praias fluviais”.
Lembran que se trata dun proxecto de posta en valor de todo o curso do río Xallas, que será vertebrado por unha senda peonil, asi como o patrimonio do Olimpo Celta, “creando produtos e experiencias turísticas a partir dos recursos patrimoniais, naturais e culturais, máis singulares e diferenciadores do territorio, que actúen como atractores de segmentos de turistas especializados: turismo activo-deportivo no medio natural, turismo científico-xeoturismo/astroturismo/ecoturismo-, turismo cultural, etc.)”
Así, piden colaboración para cubrir esta enquisa.