Galiza Celta Delémont volve poñer banda sonora galega á Bruntrutaine de Porrentruy

A cidade de Porrentruy, no cantón suízo do Xura, volve encherse de deporte, tradición e ambiente festivo coa celebración da Brutraine BCJ, unha das carreiras populares máis emblemáticas da rexión. Neste evento, que cada ano reúne a corredores e espectadores no corazón histórico da cidade, o grupo Galiza Celta Delémont volve desempeñar un papel destacado, achegando o son inconfundible da música galega para animar aos participantes durante a proba.

A Brutrutaine é unha carreira moi especial dentro do calendario deportivo local. O seu percorrido atravesa a pintoresca cidade vella de Porrentruy, cun circuíto técnico que discorre por rúas estreitas, zonas empedradas e escaleiras, todo iso baixo a impoñente silueta do castelo que domina a localidade. Este trazado, esixente e singular, converte a competición nunha experiencia única onde o deporte se mestura co patrimonio histórico e o ambiente popular.

Neste escenario tan particular, Galiza Celta Delémont converteuse xa nunha presenza habitual. O grupo participou en diversas ocasións formando parte do elenco de artistas encargados de amenizar a carreira, animando aos corredores e ao público co ritmo das gaitas, pandeiretas e melodías tradicionais de Galicia. A súa música acompaña o esforzo dos atletas mentres percorren as empinadas rúas do casco histórico, creando unha atmosfera festiva que fai da Bruntrutaine algo máis que unha simple carreira.

A participación do grupo non é froito da casualidade. Con tesón, constancia e un gran traballo cultural, Galiza Celta Delémont gañouse un lugar destacado no panorama cultural suízo, especialmente na cidade de Delémont e os seus arredores. Grazas á súa actividade, a cultura galega (a súa música, os traxes rexionais, as tradicións, a gastronomía e a memoria da emigración) está cada vez máis presente e integrada nesta rexión helvética.

O son das gaitas resoando en prazas e rúas converteuse en algo familiar para moitos veciños do Xura. A presenza do grupo en festas, eventos culturais e actividades populares consolidou o seu recoñecemento dentro da comunidade local.

A Brutrutaine ten ademais un significado especial para a comunidade galega residente na zona. En Porrentruy viven numerosos veciños procedentes de comarcas galegas como Bergantiños ou a Costa da Morte, territorios cunha longa tradición migratoria. Para moitos deles, escoitar a música tradicional galega nun evento tan importante da cidade supón tamén un vínculo emocional coa súa terra de orixe.

O evento e a cidade están profundamente ligados a un símbolo moi particular: o xabaril. Este animal, emblema de Porrentruy, está asociado a unha antiga lenda que fala de valentía e determinación, valores que tamén poderían describir o espírito do propio grupo Galiza Celta Delémont.

Conta a historia que, hai moitos séculos, un enorme xabaril apareceu de súpeto e saltou a muralla de tres metros que rodeaba a cidade coma se fose un obstáculo insignificante. A besta sementou o pánico entre os habitantes ata que un valente cidadán logrou abatela lanzando a súa machada desde unha xanela. O animal caeu finalmente fronte ás escaleiras do Concello.

Aquel suceso levou ao Consello da cidade a decatarse de que, nalgúns puntos, as murallas eran demasiado baixas para protexer a cidade de posibles ataques. Decidiron entón reforzalas e, en recordo daquel episodio, declararon ao xabaril como emblema de Porrentruy. Desde entón, o animal figura nos estandartes e selos oficiais da cidade como símbolo de coraxe e protección.

Dalgún xeito, ese espírito de valentía, traballo constante e perseveranza tamén define o camiño percorrido por Galiza Celta Delémont. A base de esforzo e paixón pola cultura galega, o grupo logrou integrarse plenamente na vida cultural da rexión.

Cada nova participación na Bruntrutaine reforza ese vínculo entre tradición, comunidade e cultura. Así, entre o son das gaitas, o esforzo dos corredores e o entusiasmo do público, a cidade de Porrentruy volve demostrar que o deporte e a cultura poden camiñar xuntos… mesmo ao ritmo da música galega.
 

• Alejandra Plaza.

Máis novas dende o corazón de Europa