Cando febreiro asoma polas montañas nevadas e o frío suízo aperta as meixelas, hai algo que consegue derreter ata o último copo de xeo: o entroido organizado pola colectividade galega e española! Porque se algo quedou claro en Lyss, Delémont e Xenebra é que a morriña se cura con música, disfraces… e moita retranca!

Delémont: espírito celta e folclore tradicional contra o frío alpino

En Delémont, o entroido tivo acento costeiro e ritmo de muiñeira. A música tradicional foi a gran protagonista. As gaitas resoaron con orgullo e as pandeiretas marcaron o compás. Se algo caracteriza á nosa xente é que onde hai unha mesa longa… hai festa asegurada. Galiza Celta Delémont volveu demostrar que a enerxía galega non entende de fronteiras. Tras celebrar o ano pasado o seu X aniversario por todo o alto con emoción, orgullo e un éxito rotundo, a asociación segue mirando cara a adiante con ambición e creatividade. O entroido foi outra mostra da súa vitalidade. E atención, porque este ano traerá a segunda edición do seu gran festival, que promete superar expectativas. Haberá sorpresas musicais- e das boas- onde a tradición volverá brillar con novos matices. Se algo saben facer en Galiza Celta é converter cada reto nunha celebración.

Creatividade sen límites e risas interminables no gran Entroido de Lyss

O Centro Español de Lyss encheuse de cor, música e entusiasmo para celebrar o seu esperado Entroido, unha festa que volveu demostrar que a diversión e as risas interminables son o seu distintivo selo. Socios, amigos e familias compartiron unha velada inesquecible na que o espírito festivo foi o gran protagonista. A posta en escena dos disfraces sorprendeu a todos os presentes. A creatividade e enxeño dos asistentes brillaron en cada detalle. O salón transformouse nun escenario vibrante onde a imaxinación non tivo límites. Máis aló do festexo, a celebración tamén foi unha mostra do compromiso e o esforzo co que a nova directiva tomou as rendas da entidade. Nun momento clave para o seu futuro, traballaron con dedicación para manter viva esta institución tan querida pola comunidade. O seu labor foi fundamental para soster as actividades e reforzar o sentido de pertenza que caracteriza ao Centro.

Con todo, a entidade atravesa unha etapa decisiva debido ao necesario relevo na xestión. Actualmente, atópanse na procura de novos rexentes que aseguren a continuidade do Centro. Conscientes dos desafíos que implica asumir esta responsabilidade, a directiva deseñou novas condicións que faciliten a incorporación de quen desexe tomar a testemuña, ofrecendo un marco máis accesible e adaptado ás necesidades actuais.

O Entroido non só foi unha noite de celebración, senón tamén unha demostración de que, con compromiso e colaboración, o Centro Español de Lyss pode seguir sendo un punto de encontro imprescindible. Entre disfraces, música e sorrisos, quedou claro que o espírito da comunidade segue máis vivo que nunca.

Ensaios, foliada e redes que cruzan fronteiras

Mentres tanto, A Irmandade Galega na Suíza celebrou esta época tan especial en formato máis íntimo, nas instalacións do seu renovado e precioso local social. Unha festa en pequeno formato, si, pero coa mesma intensidade sonora e emocional de sempre. Lonxe de quedarse quietos, están inmersos en intensos ensaios xunto ao grupo veciño A Roda de Lausanne. O obxectivo, participar na gran foliada do Festival EmigraSon en Bruxelas. Un encontro que promete ser unha nova edición exitosa e que, aos poucos, segue tecendo redes cada vez máis amplas entre países onde Galicia actúa como punto de unión, identidade e orgullo compartido.

Ao final, o entroido en Suíza non é só unha festa; é un recordatorio de que a cultura viaxa na maleta, instálase no corazón e florece alí onde haxa ganas de compartila. Entre montañas alpinas e gaitas atlánticas, a colectividade galega e española demostra que a distancia non arrefría as raíces… fortalece!

E visto o visto este ano, que ninguén se sorprenda se o próximo entroido fai tremer os Alpes ao ritmo dunha boa muiñeira.