Máis de 300 cativos participaron na 1ª Copa Ferroatlántica Costa da Morte de Baloncesto

O equipo alevín feminino do Calasancias Coruña e o Xiria Carballo masculino conseguiron facerse onte na súa categoría coa 1ª Copa Ferroatlántica Costa da Morte de Baloncesto. Foi un torneo moi rifado e dunha calidade excepcional polos persoais que participaron, das mellores que compiten na liga comarcal e provincial de Minibasket.

O segundos e terceiros postos en alevín masculino foron para o Baloncesto Ribeira e o Baloncesto Culleredo, quedando nun cuarto lugar o Ferroatlántica Costa da Morte, mentres que na categoría alevín feminino a segunda praza foi para o Baloncesto Xiria Carballo e a terceira para Ferroatlántica Costa da Morte, quedando nun cuarto lugar o Baloncesto Ponteceso.

Boa participación

Máis de 300 persoas, entre xogadores, pais dos deportistas e asistentes, reuníronse onte todo o día no pavillón polideportivo de Cee para gozar desta festa deportiva, xa que logo dos primeiros encontros da mañá organizouse unha comida na que participaron os pais cos seus fillos, e logo dos partidos finalistas continuouse cunha merenda.

Ás sete da tarde realizouse a entrega de premios á que asistiu o director das fábricas de Ferroatlántica de Cee e Dumbría, Carlos Oliete, patrocinador do evento, quen felicitou aos xogadores e encomiou os pais polo sacrificio que ás veces supón manter aos fillos en actividades deportivas. Oliete tivo tamén palabras de agradecemento para a directiva do AC Baloncesto Costa da Morte pola excelente organización do torneo.

Convenio de colaboración

A celebración da 1ª Copa Ferroatlántica de Minibasket supón o broche de ouro á actividade que ao longo de todo o ano realiza o AC Baloncesto Costa da Morte, sobre todo nas categorías infantil e alevín, tanto masculino como feminino. Esta é unha máis das accións que se incluíron no convenio de colaboración asinado a pasada semana polo presidente do club, José Manuel Soto, e Carlos Oliete, director de Ferroatlántica, co AC Baloncesto Costa da Morte.

Novas relacionadas

• O ACB Costa da Morte volve ser axudado por Ferroatlántica.
• O Oso Polar vence pola mínima e segue enganchado á parte alta.
• O nordés dificultou a regata Ferroatlántica máis numerosa da ría de Corcubión.

Fonte

• Nota de prensa de Ferroatlántica.