Camariñas foi o punto de encontro de proxectos innovadores que serviron para dar ideas de negocio asociadas ao mar que poden ser beneficiarias de axudas do Galp Costa da Morte.

Durante a xornada participaron empresas como Orixe Salgada, unha biorrefineria pioneira que aproveita algas varadas para a fabricación produtos agrícolas, de cosmética e nutraceutica, ou tecnolóxicas como Visor Faro, unha ferramenta de Cetmar para o análise da actividade pesqueira, marisqueira e acuícola para a ordenación e planificación de uso do litoral galego.

Tamén participaron proxectos centrados na transformación, como Marisma Biomed, un proxecto centrado na transformación de plantas de marisma en complementos alimenticios para a mellora da saúde metabólica, e outros proxectos centrados no sector das mascotas, como Seabites Natural PetCare, quen fabrica snacks e suplementos para mascotas a partir de algas e produtos do mar ou EcoCelta, que desenvolve área para gatos a partir de cunchas de mexillón. Un mar de ideas para apostar polo territorio en clave empresarial.

Transformación

Pola súa parte, o Xerente do GALP Costa da Morte, Guillermo González, resaltou a importancia de proxectos que aposten pola transformación dos produtos do mar para lograr as axudas económicas de maior importe, “as ideas que vaian nesta liña son as que engaden valor”, matizou. Ademais, Guillermo González, explicou que “é importante ter traballado o proxecto e enfocar as dúbidas previamente á publicación das axudas, para poder presentarse en prazo e forma, sobre todo no caso de precisar licencias previas”. 

A xornada contou tamén coa presenza da Presidenta da Agrupación de Mariscadoras de Camariñas, Jackie Lista, que resaltou a importancia de apostar polo territorio e a posta en valor da pesca artesanal, quen agradeceu ademais poder contar con iniciativas divulgativas en Camariñas, quen acompañou á Directora Territorial da Consellería do Mar da Xunta de Galicia, María José Cancelo, quen avanzou que as axudas publicaranse no primeiro trimestre do ano., dato que reforzou o Xerente do GALP Costa da Morte, Guillermo González, indicando que previsiblemente será entre xaneiro e febreiro.

Un orzamento de máis de 5.600.000 euros no total do programa para a Costa da Morte

Como salientou Javier Germade, un dos redactores da estratexia de desenvolvemento local participativo (EDLP), as axudas do GALP Costa da Morte son apoios económicos dirixidos a impulsar proxectos no tecido empresarial da Costa da Morte, nos que se creen postos de traballo e poñan en valor o territorio.

Por outra parte, os apoios económicos do GALP fomentan a participación de mulleres e buscan garantir o relevo xeracional no sector pesqueiro. Entre os obxectivos, tamén figura o fomento da economía azul, o impulso do benestar social e do patrimonio cultural.
As persoas beneficiarias poden obter unha axuda que vai dende o 35 ao 50% do gasto subvencionable, dependendo da puntuación obtida, ata un máximo de 200.000€, podendo ser incluso chegar ata unha porcentaxe do 100% no caso da pesca artesanal.