19 locais montan no tren da 5ª edición do Carballo por Etapas

Redacción
10 de abril de 2017 (07:37 h.)
Serán finalmente 19 os locais de hostalería que participarán na 5ª edición da ruta gastronómica “Carballo por Etapas”. Unha iniciativa que organiza a Concellaría de Promoción Económica e a Asociación de Xóvenes Empresarios de Bergantiños (Axober), e que se celebrará as fines de semana do 26 ao 28 de maio e do 2 ao 4 de xuño. Na relación hai locais situados en distintos barrios urbanos, polo que o tren turístico que acompaña ao evento edición tras edición fará este ano un completo percorrido pola vila. Na listaxe de participantes figuran A Barra Bar, A Cervecería de Luis, A Nova Ferradora, Cafés A Cafeteira, cafetería Abastos, cafetería bar Ginebra, cafetería Habanos 79; cervecería Ágora, cervecería Dublín, cervecería La Bombonera, mesón A Cabaña, mesón As Viandas, Mio Fratello (de próxima apertura na rúa Carlos Casares), restaurante El Hórreo, restaurante Mesón do Pulpo, restaurante vinoteca A de Pako, taberna O Mexillón, o Bar Embajador e trattoría pizzería Vesuvio.

Ademais tamén participarán varias empresas, que colaboran co Concello de Carballo e a Asociación de Xóvenes Empresarios de Bergantiños (Axober) facilitando todo tipo de produtos. Polo momento está confirmada a participación de Bodegas Carballo, Proquiber, Distribucións Cotelo, Disboa e Exclusivas Rivas Suárez, ademais de Conservas Calvo.

Deste xeito, a primeira fin de semana estará dedicada ao atún Calvo e a segunda, aos produtos de Bergantiños. As tapas custarán 1,5 euros, e con cada unha entregarase un boleto tipo rasca co que a clientela poderá conseguir premios instantáneos. O horario será de 20 a 22 os venres, e de 12 a 14 e 20 a 22 os sábados e os domingos.

Novas relacionadas

Fonte

  • Redacción QPC (info@quepasanacosta.com)
  • Concello de Carballo
Etiquetas
carballo