O BNG reclama á Xunta que provea a praza de pediatra e o seu servizo de enfermería no centro de saúde de Carnota

O BNG da Costa da Morte, a través do deputado Oscar Insua, presentou iniciativas no Parlamento galego para reclamar ao Sergas que provea a praza de pediatría no centro de saúde de Carnota de forma urxente, cun profesional médico especialista, así como a restablecer o servizo de enfermería pediátrica, retirado estes días a pesar das protestas da veciñanza.

Insua e o vicerresponsábel local do BNG de Carnota, Primitivo Pedrosa, acompañados doutros membros da formación nacionalista no municipio, reuníronse este xoves 20 de marzo con familias de Carnota afectadas, que insistiron en que a situación segue agravándose dende hai un ano.

Pedrosa manifestou que “cada día o Partido Popular alí onde goberna recorta máis e máis os servizos públicos, como os da sanidade en Carnota. A este paso imos quedar catro neste pobo, porque a xente marcha para onde hai servizos. 
Pedrosa reprochou ao PP que “despois din que se preocupan polo descenso demográfico... mais ben penso que eliminando servizos como o pediatra fan todo o contrario; dende o BNG imos apoiar aos pais e nais nesta reivindicación que ademais de xusta é necesaria”.

1.000 sinaturas

O BNG de Carnota anunciou que xa leva recollida case 1000 sinaturas entre a veciñanza para demandar ao Sergas o restabelecemento inmediato do servizo pediátrico no municipio, e indicou que continúa coa campaña de firmas.

Máis novas do conflito