O deputados populares Paula Mouzo e Rubén Lorenzo defenden os Orzamentos da Xunta 2026 para a Costa da Morte
Chegan as primeiras valoracións da proposta de Orzamentos do goberno da Xunta para 2026.
Do bando popular, os deputados autonómicos, Paula Mouzo e Rubén Lorenzo, cualificaron hoxe de “moi positivos” os orzamentos.
Analizado o documento, os populares subliñaron o “gran protagonismo” que teñen os investimentos da zona, destacando, en primeiro lugar, os 8 millóns de euros que se recollen nas contas para impulsar a VAC Baio-Berdoias para o 2026, os 10 millóns comprometidos para o 2027 e os 12 para o 2028.
Con todo, a hemeroteca descóbrenos que falamos da mesma partida de 8 millóns que xa estaba nos Orzamentos de 2025, (hai unha constante redución e repetición das partidas non executadas ano tras ano) que segue retrasando unha obra absolutamente necesaria despois de 9 anos sen mover unha soa pedra dende a apertura do tramo ata Baio.
A que parece que si avanza a bo ritmo e a Variante de Carballo que ten ten unha partida destinada para 2026 de 500.000€ (cómpre lembrar tamén que o proxecto xa foi licitado en 2020 a 4 días das eleccións autonómicas) . Recoñecen o retraso tendo en conta a situación dos trámites administrativos previos aos comezos das expropiacións e posterior licitación, un investimento total de máis de 22 millóns de euros.
No capítulo de industria, Mouzo e Lorenzo consideran que “Bergantiños e Costa da Morte non quedarán atrás no que respecta a avanzar en máis solo industrial”, dixeron os populares, que destacaron a ampliación do polígono Industrial de Bértoa, en Carballo, cunha partida de 4,8 millóns de euros (coa previsión de inicio de obras no ano 2027), os 626.000 euros que se destinarán ao proxecto para a creación do polígono industrial de Coristanco, cun importe total de case 11 millóns, e os 64.497€ para o futuro polígono de Cabana, no que se investirán ata o 2032 máis de 20 millóns.
En canto ós polos de emprendemento, dende o PP apuntaron que recibirán 380.000 euros en toda a provincia, entre os que se atopa o do Concello de Coristanco, así como o apoio aos colivings, como o de Laxe.
Actuacións en saneamento
En materia de saneamento, os populares explicaron que os orzamentos galegos contemplan máis de 16 millóns para axudar aos concellos a implantar e mellorar os servizos de saneamento e abastecemento.
“Seguirase avanzando nas obras para evitar o risco de inundacións do río Anllóns, unha obra máis que necesaria e que suporán unha inversión total de 6,4 millóns de euros para os Concellos de Carballo e Ponteceso (306.000 nesta anualidade)”, explicaron os populares.
Ademais, as contas recollen diversas actuacións en saneamento e depuración, destacando os 13,9 millóns de euros para a depuradora de Cee-Corcubión (1 M€ para o 2026); 1,2 millóns para os colectores e depuradora de Beo en Malpica de Bergantiños, así como a nova depuradora de Traba no Concello de Laxe á que se destinará 1 millón de euros.
Mar
En canto a Portos de Galicia, o ente autonómico ten previsto acometer melloras nos portos da Comarca; case 300mil€ para a reposición de cuberta e acondicionamento de edificacións en Fisterra, e a dotación de departamentos para usuarios en Camariñas.
Tamén se formula a reposición da cuberta da lonxa de Portocubelo, en Carnota, por importe de 200.000 euros; a remodelación do vía de acceso ao porto de Corme, cun orzamento plurianual de case 500.000 euros; e a mellora da operatividade do porto de Malpica, para a que se prevén 300.000 euros en 2026 dos 5 millóns de euros plurianuais e para a que se asinará un convenio de colaboración coa Fundación Universidade da Coruña para novos estudios.
Tamén se consignan partidas para outras actuacións en fase máis inicial como a reparación dos departamentos de exportadores de Malpica, os departamentos de Muxía e os de Camariñas, o estudio de estabilidade no porto de Caión (A Laracha) e o porto mixto de Corcubión.
Ensino
En materia de infraestruturas educativas, Mouzo e Lorenzo destacaron a rehabilitación integral do IES Alfredo Brañas, xa en obras, cunha inversión total de 1,7 millóns de euros, 1,3 millóns para o exercicio 2026.
Tamén se acometerá na comarca unha reforma integral do CEIP O Areal de Camariñas, cun investimento previsto de 965.112 euros. “Ademais das obras, as familias da nosa comarca veranse beneficiadas co novo bono de comedores escolares cunha partida total nestes orzamentos de 3 millóns de euros”, explicaron.
Neste capítulo, as contas galegas recollen para este ano unha dotación específica de 600.000 euros para a redacción do proxecto do CIS de Carballo, infraestrutura que, segundo os populares, suporá un antes e un despois na atención sanitaria na Comarca de Bergantiños. Ademais, indicaron destinaranse 326.000 euros para un novo mamógrafo do Hospital de Cee.
Patrimonio
Por outra bando, os populares avanzaron que a Xunta de Galicia tamén afrontará neste 2026 a protección do patrimonio cultural da comarca levando a cabo a restauración do Santuario da Virxe da Barca -370.000 euros- e unha curiosa actuación arqueolóxica sub-acuática en Punta Restelos Cee e Corcubión (40.000 euros).