Mulleres que coidan mulleres: así se vive o 8M nas Casas do Maior da Costa da Morte
Nas Casas do Maior Costa da Morte - Rede de Cooperativas Colaxe, o 8 de marzo, Día Internacional da Muller, reflíctese tamén na realidade cotiá destes espazos de coidado no rural.
E coincidindo coa data, a rede cooperativa quere poñer en valor o traballo das mulleres no ámbito dos coidados, unha tarefa esencial para o benestar da sociedade e especialmente importante no medio rural.
Actualmente, as 21 Casas do Maior Costa da Morte están atendidas por mulleres que traballan como coidadoras dentro da Rede de Cooperativas Colaxe, profesionais que cada día acompañan e atenden persoas maiores nos seus propios concellos, ofrecendo un servizo de proximidade que permite ás persoas usuarias continuar vivindo no seu entorno habitual.
Estes centros convértense tamén en lugares de encontro e acompañamento para moita mulleres maiores, onde atopan compañía, actividade e apoio no seu día a día.
Nas Casas do Maior da Costa da Morte esa realidade vese con claridade: mulleres que coidan e mulleres que son coidadas, compartindo espazos que contribúen a mellorar a calidade de vida das persoas maiores e a reforzar a vida comunitaria nos concellos da comarca.