Un incendio en Zas completou unha tráxica fin de semana na Costa da Morte

Aínda co susto do perigosísimo incendio en Boca do Río, e dos intentos de Ézaro, Mallou… esta madrugada de sábado a domingo a Xunta daba por Extinguido o incendio de Fisterra tras arrasar 134,1 ha dos montes de Duio e Sardiñeiro.

Tamén durante a madrugada do venres ao sábado algún desalmado prendeu lume nos montes de Muíño, en Zas. Os efectivos contraincendios (9 axentes, 10 brigadas, 7 motobombas e 2 pas.) ademais dos compañeiros de Protección Civil, traballaron durante toda a noite. Deron controlado o lume pero a Consellería de Medio Rural non o deu por extinguido ata esta mañá de domingo, pasadas ás 11:00h, despois de recoñecer que o lume afectou a 20,9 hectáreas (cómpre lembrar que a Xunta só informa dos incendios que afectan a máis de 20 ha).

Completouse así unha fin de semana dramática en toda Galicia, e tamén, como non na bisbarra.

Aparellos incendiarios

Unha vez que sabemos que no caso de Carnota si que pode haber unha investigación que dea co culpable, a Xunta informa de varios artefactos incendiarios localizados polos profesionais do Servizo de Prevención e Defensa de Incendios Forestais de Galicia (SPDCIF) nalgúns dos lumes rexistrados nos últimos días en Galicia.

Dada a dificultade de atopar aos responsables de todos os incendios, a Xunta apela á colaboración cidadá.

085

A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal.
Ademais, existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento: 900 815 085. Así mesmo, toda a información actualizada sobre incendios forestais poderá ser consultada na conta aberta de twitter: @incendios085.

Novas relacionadas

• Incendio na Boca do Río: “Era unha bomba. Puido haber unha traxedia”.
• O incendio forestal arrasa 130 hectáreas en Fisterra.

Máis novas sobre incendios

• Maio 19: Segundo incendio en tres días en Fisterra.
• Marzo 19: Tres incendios en Baio, Fisterra Vimianzo fan saltar todas as alarmas tamén na Costa.
• Agosto 18: Fisterra, pasto dos incendiarios con 5 incendios en dúas semanas.

NOVAS SOBRE PREVENCIÓN

• Agosto 19: Ponteceso atrévese a meter man na xestión das franxas antiincendios.
• Falando de prevención: O Bombeiro durminte de Louro.
• Abril 19: “O lume non pode ser un negocio para ninguén”.
• 12-04-19: O Consorcio Provincial Contraincendios aproba a xestión directa dos parques de bombeiros comarcais.