Acolleu este sábado a Confraría de Pescadores de Laxe un novo “espazo xerador de cultura” do proxecto Novemares, impulsado pola Fundación Eduardo Pondal. Desta volta, a xornada quixo afondar sobre a nosa gastronomía, nunha sesión calificada como “A Despensa do Mar”, que convertía o noso produto pesqueiro na porta de entrada da cultura do mar na Costa da Morte.

Interviron o mariñeiro e alcalde de Laxe, Francisco Charlin; Xosé Regueira, Vicepresidente da Deputación da Coruña e promotor do proxecto Os Fogóns do Anllóns; Jorge Guitián, xornalista, divulgador e crítico gastronómico; e Antonio Otín, de O Forno de Guísamo.

Gastronomía como promotor turístico

A xornada comezaba poñendo en valor a importancia da nosa gastronomía mariñeira, do noso peixe e marisco como embaixador e gran atractivo da Costa da Morte. Quixeron destacar tamén o papel pioneiro da Confraría de Laxe na divulgación do produto local do mar, a través do proxecto Mar de Laxe.

Nese sentido, os ponentes reflexionaron sobre a necesidade de “aproveitar o momento de transición, de transformación do turismo, do debate que tipo de turismo queremos, neste momento de reflexión que se está dando hai que apostar, dende a Costa da Morte, por un “destino maduro” no que a gastronomía é un dos seus principais recursos económicos, unha porta de entrada para desenvolver outras actividades e iniciativas, e crear contidos e significación dun territorio”. Porque a nosa gastronomía mariñeira atrae turismo e fixa emprego e poboación, trasmite cultura e xera identidade.

Valor engadido

Pero tamén puxeron fincapé nos camiños que nos quedan por percorrer, tendo pendente, por exemplo aproveitar o selo de calidade de Artesanía Alimentaria de Galicia; ou, sobre todo, desenvolver o valor engadido a un produto tan bo como o que temos.
Se ben puxeron o exemplo da empanada de mar de O Forno de Guísamo, indicaron que o camiño ten que ir por seguir apostando pola transformación de produtos pesqueiros menos comerciais (xarda, xurelo, boga, pinto, etc) que poden dar xogo a propostas culinarias atractivas e de calidade (hamburguesas, …).

Para iso apostan por “unha estratexia conxunta dos produtos do mar e da terra onde se conte coa implicación e participación da restauración a través de propostas gastronómicas baseadas no produto local, de calidade. Contando, sempre, co apoio das Administracións”. “O produto pesqueiro, o produto do mar, a través da súa transformación e consumo ten que seguir o cambio de paradigma doutros produtos galegos de calidade como son o viño ou o queixo, que apostaron por modelos de negocio centrados nun produto transformado de calidade, a gastronomía, o produto elaborado é esa chave”, explican.

Para iso hai que traballar en como contalo ben, explicando os procementos, o proceso de captura, recolección, traballo, dando conta de que falamos dun produto fresco de máxima calidade, que ademais é símbolo da identidade e cultura dun territorio costeiro.

Novas relacionadas