O Concello de Carballo ten en marcha dúas grandes obras noutras tantas instalacións deportivas municipais, nas que estamos a realizar un investimento que supera o millón de euros. 

Seguen as obras o campo de fútbol do Carral, en Sofán, coa construción dun novo graderío, con máis capacidade e espazos anexos debaixo, en concreto zonas de lavandería e ximnasio. Tamén se constrúe un soto, que polo momento queda sen acondicionar. O investimento acada os 300.000 euros.

Nas Eiroas

Por unha banda, no complexo deportivo das Eiroas avanza a construción do terceiro campo de céspede artificial, que pretende satisfacer a elevada demanda existente. As obras permitirán habilitar un novo campo de fútbol 8, que quedará unido aos existentes para poder aproveitar os edificios e servizos cos que conta o complexo. 

Dentro do mesmo proxecto incluíuse a substitución do céspede do campo de fútbol principal, que sufría un gran desgaste debido ao gran uso que ten, e porque ademais, segundo as bases reguladoras de normas de competición da Segunda RFEF, na que xoga o Bergantiños esta tempada, os partidos deben disputarse “nun terreo de xogo de herba natural ou artificial de última xeración, cunha antigüidade máxima de oito anos”, que son os que tiña o céspede das Eiroas.  O investimento total achégase aos 800.000 euros.

Pavillón

A maiores, no pavillón polideportivo Carballo Calero realizouse un investimento próximo aos 300.000 euros que permitiu cambiar o pavimento de toda a superficie e a instalación dunha valla en todo o perímetro. O pavillón dispón desde o comezo da tempada dun novo pavimento deportivo válido para adestramento e competición de baloncesto, fútbol sala, balonmán, bádminton ou voleibol, así coma para deportes sobre rodas, como patinaxe artística ou hóckey.