Ánxela Franco, responsable da área de Servizos Sociais da Deputación da Coruña, visitou o centro de día de Aspaber A asociación de Pais de Discapacitados Psíquicos de Bergantiños - Aspaber - é unha das cinco entidades sociais da provincia da Coruña que se beneficiarán das axudas concecidas pala área de Servizos Sociais da Deputación provincial. En concreto, a entidade de Carballo recibirá un total de 101.960,32 € para subministro e instalación de mobiliario no centro de día. A finalización das obras dos centros das entidades sociais e a adquisición de equipamento para o seu funcionamento é o obxectivo da nova liña de subvencións en concorrencia competitiva pola que a área de Servizo Sociais destinará un total de 679.105, 41 euros a cinco entidades da provincia. “A convocatoria naceu dunha demanda que detectamos en visitas e reunións coas entidades. Precisábase unha achega especial para poñer fin a obras de acondicionamento e equipamento e, como defendemos para todas as áreas, optamos por convocar unha liña en concorrencia competitiva, para que todas as asociacións puideran optar en igualdade de condicións”, explica a deputada da área, Ánxela Franco. As entidades beneficiarias das achegas, ademais de Apaber, son a asociación Pro-enfermos mentais da Coruña con 85.269,57 € para ampliar e acondicionar o centro de rehabilitación psicosocial e laboral “Kerámicos”; A.M-I.C.O.S. da Barbanza con 192.875,52 € para equipamento, dotación de centro transformador e accesibilidade exterior do centro de atención integral; Cáritas Diocesana de Santiago con 180.000 € para obras de construción do novo centro de atención social continuada para persoas sen fogar e a asociación de pais de persoas con transtorno de espectro autista, Aspanaes, con 119.000 € para a ampliación do servizo de atención diúrna terapéutica en Santiago de Compostela. A Deputación manterá esta nova liña en vindeiras edicións, “na procura de crear unha administración igualitaria, como defendemos desde o inicio do mandato ao optar por reducir ao máximo as subvencións nominativas”, sinalou Ánxela Franco que marca como un dos obxectivos fundamentais da súa área “traballar conxuntamente coas entidades prestadoras de servizos sociais para que dispoñan dos recursos precisos para prestar uns servizos da máxima calidade”. Novas relacionadas

• Aspaber, 40 anos como entidade Fóra de Serie
• Aspaber recolle en “Fora de serie” os seus corenta anos de traxectoria.

Fonte

• Redacción QPC ([email protected])
• Deputación da Coruña