Arrincaron onte as obras da segunda fase da mellora da accesibilidade do mercado de Carballo. Unhas obras para instalar un ascensor que conecte directamente o mercado e a feira. As obras teñen dous meses de prazo, tempo durante o cal a entrada e a saída do mercado realizaranse pola rúa Gran Vía.
As obras son desenvoltas por “Desarrolla” por 300.000€, cunha subvención de Agader de 50.000€ e o cargo ao remanente de 2019.

A obra completa a primeira fase de reforma do interior do edificio, intentando conseguir que entre na rede de mercados excelentes de Galicia. A día de hoxe, o Mercado Municipal ten un índice de ocupación do 50% (4 carnizarías, 6 peixarías, 1 froitería, 3 panadarías, 1 florería, 1 bar, 1 queixería e 2 tendas non alimentarias). Ademais, a Concellaría de Feiras e Mercados estase a traballar no próximo concurso de adxudicación dos postos.