Once peóns resultaron feridos nas rúas de Carballo durante o 2015

07:08 17/03/16

A Policía Local de Carballo presentou un informe sobre a siniestralidade nas vías da vila Despois do fátido mes de febreiro nas estradas da Costa da Morte, a Policía Local de Carballo vén de presentar un informe no que se reflicte que as rúas Gran Vía e Vázquez de Parga son as que presentan un maior número de accidentes de tráfico na capital carballesa. Segundo se desprende do documento, en 2015 rexistráronse 58 persoas feridas, dos que 11 foron peóns; mentres que no que vai de 2016 rexistráronse 16 persoas feridas, con un peón entre elas. Ante esta situación, a Policía Local anuncia que está a realizar un labor preventivo "nos puntos estratéxicos e onde se rexistraron maior número de sinistros en anos anteriores", ademais da posta en marcha de medidas como aforadores, glorietas de nova construción, cambios no sentido de circulación nalgunhas rúas e implantación do sentido único noutras ou o ancheamento de beirarrúas e mellora do alumeado público. O obxectivo, sinala o informe: "mellorar a fluidez do tráfico e a seguridade". As zonas da capital carballesa nas que se teñen rexistrado un maior número de accidentes de tráfico no ano 2015 son a Gran Vía - con 15 sinistros - e a Vázquez de Parga - con 21 sinistros - con 36 incidentes. A tendencia na Vázquez de Parga continúa en 2016, xa que nos dous primeiros meses do ano segue sendo a vía con maior número de accidentes, con 5. Así o reflicte o informe da Policía Local presentado na Comisión Especial de Seguridade celebrada o martes 15 de marzo con presenza de todos os grupos da corporación. Tanto o concello como as forzas de seguridade solicitan a peóns e condutores que extremen as precaucións nesas zonas, con gran intensidade de tráfico, e tamén especialmente na confluencia de ditas vías onde se teñen rexistrado 3 dos 36 sinistros. Controis de alcolemia Dos controis das alcolemias realizados en 2015 na capital bergantiñana, 70 probas tiveron resultado positivo, 18 en accidentes de circulación. Tramitáronse 51 por vía xudicial e 19 por vía administrativa. A Policía Local sinala que se ten detectado un incremento nos condutores ao volante que circulan baixo os efectos de bebidas alcólicas. De feito, aínda que entre as causas máis cotiás dos accidentes no que vai de ano están maioritariamente a de non respectar as prioridades de paso - cun 33,33% -; ou non prestar a atención suficiente - 20,83%-; tamén hai que sinalar que un 8,33 por cento dos sinistros tiveron como causa a condución baixo os efectos de bebidas alcólicas. En 2015 a Policía Local realizou cinco campañas e controis coa colaboración da Garda Civil de Tráfico cun balance de 11.440 vehículos controlados e 159 denuncias tramitadas; mentres que 131 vehículos foron retirados da vía pública, a maioría deles por causar incidencias graves na circulación. En todo caso, a Policía Local cualifica como "satisfactoria" a campaña de prevención en seguridade viaria, evitándose "en certa medida" que se producisen accidentes, infraccións ou atropelos de peóns.