A Agrupación Deportiva Un Paso Máis celebrou onte, co gallo do Día Internacional das Persoas con Discapacidade, unha xornada de alto valor didáctico centrada no deporte adaptado. O CEIP Plurilingüe A Gándara Sofán de Carballo recibían a varios membros da directiva para facer unha xornada de sensibilización activa e aprendizaxe competencial con todo o alumnado do centro, dende Educación Infantil ata 6º de Primaria. O obxectivo pedagóxico principal foi que o alumnado tivese a oportunidade de experimentar en primeira persoa as diversas modalidades de deporte adaptado.

A sesión incluíu a práctica e o coñecemento de Baloncesto en cadeira de rodas, Blindfutbol (fútbol para invidentes), Voleibol sentado e mesmo Circuíto para invidentes.

A metodoloxía aplicada foi a da aprendizaxe experiencial. Antes de iniciar cada práctica, o alumnado recibiu unha explicación didáctica sobre o deporte e as adaptacións necesarias.

Ao remate da actividade adaptada, os participantes tiñan a oportunidade de practicar o mesmo deporte na súa versión ordinaria. Esta estratexia metodolóxica permitiu aos nenos e nenas comparar e interiorizar o esforzo, a destreza e a resiliencia que require a modalidade adaptada, fomentando así a empatía e a valoración positiva da diversidade funcional entre a comunidade educativa.

Dende Un Paso Máis, valórase moi positivamente o éxito formativo e de participación desta xornada, subliñando a excelente coordinación e compromiso do equipo directivo do CEIP A Gándara Sofán e o apoio incondicional de todo o cadro docente, que se implicou activamente nas distintas probas.

Proxecto de Inclusión: Roteiro de Sensibilización en Centros Educativos

Esta actividade enmárcase como unha nova etapa dentro do roteiro de sensibilización e inclusión que a Agrupación está a desenvolver nos centros educativos da comarca durante este curso académico. Un Paso Máis xa visitou este ano os colexios: Nétoma Razo, Bergantiños e A Gándara Sofán de Carballo, Alfredo Brañas de Paiosaco, e Alfredo Brañas de Corme.

Grazas a esta iniciativa continuada, a asociación volve a superar o longo milleiro de alumnos e alumnas sensibilizados nun só ano. As próximas paradas previstas, que seguirán promovendo estes valores, serán: CRA Ponte da Pedra, Xesús San Luis Romero e A Cristina, todos eles en Carballo, Cabo da Area de Laxe, e Otero Pedrayo de A Laracha.
 

Formación para Familias: Obradoiro sobre Rutinas Diarias

Por último, a Agrupación lembra que o vindeiro sábado 13 de decembro continuará co seu ciclo de obradoiros de familia no Casino de Carballo. Nesta ocasión, a sesión de traballo centrarase na importancia das rutinas diarias como elemento de estabilidade e desenvolvemento. Aínda quedan prazas dispoñibles para as familias que desexen participar neste espazo de formación e apoio mutuo.