Segue pasando. As embarcacións, ante as esixentes cotas que limitan as capturas, intental colar os excedentes duplicando as etiquetas ou intentando manipulalas.

Así o detectaron os Efectivos do Servizo Marítimo da Garda Civil (SEMAR), que procederon á incautación de 606 quilogramos de sardiña no Porto de Corcubión, por irregularidades na documentación e na etiquetaxe dos produtos.

Durante unha inspección rutineira, axentes da SEMAR detectaron que a sardiña, transportada nun camión, carecía da documentación necesaria para garantir a súa trazabilidade. Ademais, comprobouse que a etiquetaxe do produto estaba duplicada, o que constitúe unha infracción da normativa vixente.

Tras as investigacións pertinentes, determinouse que a sardiña incautada procedía dun exceso no límite de capturas realizada por un pesqueiro e fora descargada no Porto de Corcubión.

Como consecuencia destas irregularidades, elaboráronse dous informes contra a empresa comercializadora, con sede na Coruña, polos seguintes conceptos: Transporte de produtos pesqueiros sen a documentación requirida e comercialización de produtos pesqueiros fóra das canles legais.

A sardiña incautada foi entregada, en concepto de recibo, ao Banco de Alimentos Rías Altas da Coruña, para que poida ser aproveitada polas persoas necesitadas.