Catro concellos non renden contas
Todos os anos, por estas datas, difundimos información sobre o estado de rendición da conta xeral dos nosos concellos. Polo tanto, fieis á tradición iniciada en 2013, presentamos a situación a día de hoxe, cando transcorreu un mes do vencemento do prazo legal (15 de outubro de 2016) para cumprir con esta fundamental obrigación.
Excepto os Concellos de Coristanco, Fisterra, Muros e Santa Comba, que incumpriron coa súa obriga, todos os demais respectaron o prazo legal de remisión.
Ante o irregular comportamento dos catro concellos mencionados, o vixente ordenamento xurídico permite impoñer as seguintes medidas para que se cumpra con esta inescusable obrigación:
- 1) non permitir concorrer a subvencións e axudas mentres non se remitan as contas;
- 2) reter parte dos fondos que o Estado transfire aos concellos para financiar gastos correntes;
- 3) impoñer multas coercitivas aos responsables.
De sempre, fun partidario da imposición de multas ata conseguir a rendición, antes de utilizar as outras dúas medidas (impedir o acceso a subvencións e retraer fondos da participación nos ingresos do Estado). Porque, coa primeira solución, as consecuencias recaen sobre os auténticos responsables do incumprimento; e, nos outros dous supostos, os prexudicados son as propias entidades, que se verán privadas de parte de recursos, o que pode afectar ao normal funcionamento dos servizos municipais e, por conseguinte, aos veciños.
Neste sentido, o Consello de Contas de Galicia pode impoñer multas coercitivas aos contadantes, por importe de un a dous meses do soldo, cando se trate de persoal do sector público, e de 600 euros a 6.000 euros cando os que non atendan os requirimentos sexan particulares. Considero que este debe ser o camiño. Pero unha cousa é a miña opinión e outra o que decidan facer os órganos competentes na materia.
En calquera caso, estaremos de acordo en que, para evitar riscos de quedar excluídos de subvencións, para evitar que o Ministerio de Hacienda reteña fondos e coa finalidade de que o Consello de Contas non teña que sancionar a ninguén, o máis sinxelo e render contas antes do día 15 de outubro de cada ano. Pois fagámolo!
- Domingo Guerra ([email protected]). Economista. Especialista en economía pública e política económica pola USC.
Novas relacionadas
Outros artigos sobre Economía Municipal de Domingo Guerra
- Investimentos financeiramente sostibles.
- Economía municipal: Nós cumprimos!.
- O Informe dez meses despois.
- A e-Administración.
- Economía Municipal. Reforma do financiamento local.
- Economía Municipal. Pagar tarde, mal e arrastro.
- Chegou o momento.
- O necesario control.
- Non vos parece?.
- A voltas coa débeda.
- Administracións de 4ª División.
- Non somos “mexebos”.
- Estamos a sufrir en silencio excesivo e sen saber até cando.
- O peixe intelixente.
- Desafíos municipai.
- O soldo do alcalde.
- Repasando o PIB dos Concellos QPC.
- Facturas no caixón.
- Débeda viva a 31/12/2013.
- Solvencia financeira municipal.
- Os concellos e a crise.
- Reposición da legalidade urbanística.
- Loito por culpa do mar.
- Remanente de tesourería.
- Eficacia recadatoria.
- Oportunidade perdida.
- Gasto de persoal.
- Rendición da conta xeral.
- A Conta Xeral.
- A contribución.
- Cuestión de confianza e moción de censura.
- Débeda municipal.
- A prórroga do orzamento municipal.
- Presión fiscal dos nosos concellos.
Fonte
- Redacción de QPC ([email protected]).