Este sábado, día 10 de decembro, arranca en Carballo o ciclo de cine ‘Proxectanto... para mentes inquedas’ coa proxección, as 20.00 horas, do filme Maldito Bastardo que, protagonizado por Tamar Novas e Juanillo Esteban, está dirixido polo compostelán Javi Camino. Precisamente, o autor ofrecerá un faladoiro ao remate da sesión no que responderá as preguntas dos asistentes. Este ciclo de cine, organizado pola Asociación Xuvenil Proxectanto, ofreceralle a mocidade carballesa unha oportunidade para gozar de creacións audiovisuais do cinema independente, así como pezas destacadas do panorama cinematográfico galego. Deste xeito, ‘Proxectando...para mentes inquedas’ fomentará a escena galega coa proxección de numerosas producións do país, e sempre que sexa posible, tenderase un lazo entre os artistas e o público coa celebración de faladoiros. A súa periodicidade será mensual, polo que o día 4 de xaneiro terá lugar outra sesión coa proxección do documental As Encrobas. A ceo aberto, realizada por Xosé Bocixa e Area nos ollos, da autora Maria Rama. A Asociación Xuvenil Proxectando está formada por un grupo dinámico de mozos e mozas que procura darlle voz á mocidade carballesa para que decida por si mesma, con estes obxectivos, Proxectando organiza actividades de ocio e formación orientadas á mocidade.