O Faro Fisterra berrou por Palestina
Emocionante resposta da veciñanza da Costa da Morte á chamada de auxilio de Palestina. Desta volta, lonxe de bandeiras políticas, a cidadanía comprometida da Costa da Morte acodíu á convocatoria realizada polo novo Colectivo de Apoio a Palestina - Costa da Morte, e uníu de bandeiras palestinas o treito que hai entre o monumento ao emigrante e o Faro Fisterra.
Como acontecía á mesma hora en medio planeta, xentes chegadas de toda a comarca lanzaron berros de apoio á Global Sumud Flotilla, na que está integrada a Flotilla da Liberdade; unha expedición solidaria que sairáa cunha ducia de barcos de costas españolas, que se unirán aos que partan doutros puntos do Mediterráneo, para tentar levar axuda a Gaza.
A ringleira foi percorrendo a vila do Cristo e compartindo camiño cos peregrinos que se achegaba ao Faro, e moitos se uniron ao berro mundial pola liberdade de Palestina e o fin do xenocidio sionista.
MANIFESTO do Movemento Global a Gaza Galiza
Gaza: Terror sionista televisado esnaquizando vidas, sonos e ilusións... persoas despedazadas, crianzas rebentadas, hospitais bombardeados, persoal sanitario e doentes vilmente asasinadas, valentes xornalistas que inda resistían, silenciadas de morte, chuvia macabra de mísiles, bombas, tiros de canón e disparos, destrución por todas partes, cadáveres entre entullos, tristeza, moita fame, moita sede e moita, moita dor. Angustia estarrecedora, inexistencia de futuro e un presente de espanto. Desesperación ao ver como as familias van sendo minguadas, desolación ao ver a complicidade dos gobernos, pánico ao ver até onde pode chegar a falta de humanidade e a crueldade sionista, desesperación ao ver que a infancia é obxectivo militar e incomprensión ao ver que para estes asasinos, e os seus aliados, a vida dunha palestina vale menos que nada. Estourado de bombas, choros desconsolados de bebés, ruído atronador de avións de guerra sanguinarios, lamentos de vellas finando, disparos dispersos de francotirador, alaridos desgarrados de nais ao ver as súas fillas sen vida, sons enxordecedores de tiro de canon, berros de impotencia, estrondo ao caer edificios, silencio de morte...
E outra vez, estourado de bombas, choros.... Ocuparon o seu pais, as botaron das súas casas e as incautaron ou derrubaron, arrincaron as súas oliveiras, apropiáronse das súas terras, pozos e mananciais, destruíron, dividiron, desprezaron e humillaron. E ano tras ano, crime tras crime, as foron acurrunchando.
Decidiron levantar un muro para fechalas, mais non lles pareceu suficiente, entón entraron para masacralas e eliminalas, realizando unha limpeza étnica. A pesares das asasinadas, feridas e torturadas, a pesares da crúa represión con bestiais malleiras e cadeas israelís cheas de palestinas, moitas menores, e outras sen condena previa, as palestinas seguen e seguirán na súa terra inda que que lles custe a vida. A resistencia do pobo palestino é exemplo para todas. A sociedade ao completo, novas, adultas e vellas, de cidades, de aldeas e de campos de refuxiadas, xeración tras xeración, durante décadas, levan enfrontando-se ás atroces políticas de Israel. Loita pola terra, loita pola auga, loita polas casas,..., loita pola vida. A intifada é a digna rebelión, de todas as formas posíbeis, pero sobre todo con solidariedade e autoxestión popular!. Sen apenas recursos rebeláronse contra un estado opresor armado até os dentes, con paus e pedras enfrontáronse a un exercito sádico e racista, con paus e pedras contra tanques. Feridas, queimadas, amputadas, torturadas, violadas, silenciadas, esfameadas e sedentas, os nosos irmáos e irmás palestinas resisten como poden, con orgullo e dignidade. Saben que hai gobernos de países, que se consideran civilizados, que apoian este xenocidio, saben que hai gobernos de países, que se consideran solidarios, que miran para outro lado ante esta barbarie e saben, que hai moita xente insensible que non lle da importancia a esta traxedia. Mais tamén saben que existen persoas polo mundo, que sentimos o seu sufrimento, que choramos con elas e que nos horroriza esta realidade nauseabunda. Queremos que tamén saiban que estamos organizando-nos, que queremos exercer a total solidariedade e xuntas deter este plan psicópata de exterminio racista. Xuntas saímos ás rúas a berrar, facemos cazoladas, colgamos bandeiras, organizamos manifestacións, marchas e flotillas. Por eso, desde a organización internacional “Movemento Global a Gaza”, en coalición con outras tres organizacións, estamos a preparar unha grande acción no mar, a Flotilla Sumud Global, composta de ducias de barcos que van levantar áncoras o día 31 de agosto, con tripulacións de 44 países, para levar esperanza e axuda humanitaria a Gaza e así rachar co criminal bloqueo do goberno de Israel. Para denunciar este xenocidio criminal e apoiar a esta grande flotilla solidaria, convidamos-vos a exercer a vosa solidariedade respondendo ao un chamado urxente, se se producen sabotaxes nos barcos, bloqueos nos portos ou interceptación no mar. As accións rápidas de solidariedade, especialmente nas primeiras 24 horas, son cruciais para contrarrestar os intentos de illar ou silenciar esta flotilla. A nosa preparación e disposición colectivas garante que calquera ataque á flotilla se tope cunha Ola de Resistencia Global, inmediata e visíbel.