Javier Fernández, o último redeiro de Muros
Javier Fernández é dende hai 20 anos, o último redeiro do porto de Muros. Leva 45 anos exercendo a profesión, e lembra aqueles comezos cando escapaba da escola e ía ao peirao a aprender da man de Elisardo. Agora aos seus 60 anos, e a piques de xubilarse, espera poder entregar o relevo e poder compartir a súa experiencia con algunha persoa da vila que queira aprender.
Coa intención de poñer en valor o seu legado e intentar facer un exercicio de transferencia interxeracional, o Espazo A Maceta invitábao a participar a semana pasada nun Obradoiro de Gravado e Saberes Tradicionais organizado coa colaboración do Concello. Unha ducia de persoas achegáronse para escoitar a súa historia e intentar aprender como amañar os aparellos de arrastre.
Porque se ben aínda quedan redeiras que fan betas, miños, ou aparellos de cerco, para montar os aparellos do arrastre só queda el no peirao muradán.
Na xornada estivo ensinando os típicos paneis de nós, distinto tipos de materiais (contou que antes do plástico, o nilon, ou o actual dyneema, utilizábanse esparto e mesmo cáñamo), e tivo que ir contestando ás ducias de preguntas que lle lanzaron as participantes.
Con todo, parece que se deixou algunha cousa no tinteiro e este xoves anunciou que volverá polo Espazo, coa compañía dun redeiro aínda máis experimentado, “o Latán”, para reforzar algún nó, ou contar algunha anécdota.
Mentres, segue afiando os seus últimos tempos antes da xubilación coa ilusión de que haia algún rapaz da zona con gañas de aprender, como un loureán que “ten trazas de querer aprender”.
