Era un segredo a voces, pero coincidindo coa apertura do prazo para a presentación das listas, Jose Antonio Ucha Velo vén de anunciar a súa candidatura á alcaldía de Santa Comba baixo as siglas de Espazo Común.

O ex socialista, lanza a súa candidatura cunha grave crítica aos seus excompañeiros, acusándoos de “ameazas e coaccións aos membros” da súa lista. Critica o intento de “difamar e calumniar” polas redes e en medios afíns, “xente que pide concordia mentres remexen no avespeiro”.

”Como pode alguén mentir adrede faltando á súa propia dignidade como persoa?, ou seica quen é político deixa de ser persoa?”, reflexiona Ucha nas súas redes. “Non creo que exista un universo paralelo polo que debamos comportarnos dunha determinada forma en política e simultaneamente doutra na vida persoal. O exercicio dun cargo político e a vivencia da vida cotiá ou persoal non poden ter códigos de conduta distintos”.