A asociación Íntegro vén de obter unha subvención de 34.681,62 euros para a ampliación de Diversiplás, un proxecto pioneiro na Costa da Morte que promove a integración socio-laboral de persoas con diversidade funcional a través da valorización de residuos plásticos procedentes do mar e do sector pesqueiro. A achega, financiada nun 70% pola Unión Europea e nun 30% pola Xunta de Galicia, a través da Consellería do Mar e o Galp Costa da Morte, permitirá mellorar as condicións laborais das persoas traballadoras e ampliar o catálogo de produtos elaborados con plástico reciclado.

A iniciativa contempla a dotación de equipamento adaptado, novo almacenaxe e unha bomba de calor para o obradoiro de plásticos, co obxectivo de mellorar a accesibilidade e o confort das persoas usuarias. Tamén se incrementará a produción de artigos reciclados coa creación de bolillos para as palilleiras ou peites de parafina para deportes acuáticos como o surf, contribuíndo así ao fomento da economía circular e a redución de residuos mariños.

Entre os principais obxectivos destacan a inclusión social, sensibilizar ao sector pesqueiro sobre a problemática da contaminación mariña, fomentar a colaboración cos concellos da Costa da Morte e reforzar as redes de traballo entre axentes sociais, pesqueiros e turísticos.

Con esta ampliación, Íntegro dá un paso máis na consolidación de Diversiplás como un proxecto referente en economía circular, inclusión e sostibilidade na Costa da Morte.