Unha persoa tivo que ser excarcerada tras sufrir unha saída da vía na AC-429, nas Rebuiras, en Cabana de Bergantiños, entre Neaño e a Carballa.

A chamada dunha persoa particular ao 112 Galicia apenas uns minutos despois das cinco desta tarde permitiu activar un operativo de rescate.

Así, mobilizáronse os Bombeiros de Carballo e os membros do GES de Ponteceso, ademais dos profesionais de Urxencias Sanitarias de Galicia-061, que acodiron a bordo do helicóptero medicalizado con base en Santiago.

Deste xeito, os equipos de emerxencias liberaron o único ferido neste accidente para que puidese ser atendido polos sanitarios.