Actividades para maiores en Ponteceso. Imaxe de arquivo Nunha bisbarra na que a poboación maior de 85 anos supera á infantil, todos os programas destinados a mellorar a calidade de vida deste grupo poboacional son benvidos. Así, un total de trece concellos da Costa da Morte - xunto con outros 72 da provincia da Coruña - contarán durante o ano 2016 con programas de envellecemento activo destinados ás persoas maiores grazas ao apoio económico da Deputación da Coruña, que destina un 258.000 euros a financiar este programa. Os concellos beneficiarios da bisbarra, que recibirán 3.000€ cada un - son Cabana de Bergantiños, Camariñas, Carballo, Corcubión, Coristanco, Dumbría, Fisterra, Malpica de Bergantiños, Muxía, Ponteceso, Santa Comba, Vimianzo e Zas. Con este programa, a Deputación pretende apoiar aos concellos na creación ou mantemento de actividades enfocadas a mellorar a calidade de vida dos veciños e veciñas maiores, promovendo actuacións destinadas a evitar o seu deterioro físico e psíquico e evitando procesos de illamento e exclusión social. Entre as actividades incluidas nas propostas municipais figuran programas de estimulación cognitiva, ximnasia ou musicoterapia; cursos e accións formativas destinadas aos maiores que promovan espazos de encontro e programas de convivencia interxeneracional, como escolas de avós, ou obradoiros de recuperación de xogos tradicionais e de recuperación da memoria histórica da zona. Novas relacionadas

• A poboación da Costa da Morte maior de 85 anos supera á infantil

Fonte 

• Redacción QPC ([email protected]).
• Deputación.