Camariñas recicla case un 200% máis

Camariñas

08:16 18/05/15

Que importantes son as campañas de concienciación medioambiental na formación. Por iso traemos esta clase de iniciativas, que teñen que ir sempre paralelas á accións que faciliten, neste caso, a reciclaxe. E así falan os números: O Concello de Camariñas experimentou nestes anos un incremento espectacular na recollida selectiva do colector amarelo aumentando un 183 % os quilos recollidos nestes colectores dende o ano 2011, logo de incrementar nun 136% o número de colectores amarelos ubicados no Concello.

E para que realmente sexa efectiva a campaña, toda educar, formar, con actividades como a que disfrutaron a semana pasada 80 escolares de primaria dos colexios Camariñas e A Ponte do Porto, que participaron en dous obradoiros impartidos polo Grupo Soil, a empresa contratada polo Concello de Camariñas para a recollida selectiva dos contedores amarelos e azul.

O obxectivos desta campaña son explicarlle aos rapaces a importancia dunha correcta separación dos distintos tipos de residuos e que o alumnado leve esta mensaxe a súas casas de cara a concienciar tamén as súas familias.

Obradoiro de Reciclaxe para os nenos de Camarinas

Nunha charla dinámica, participativa e divertida explicóuselle ao alumnado o que debe e non debe ir nos distintos contedores do lixo, a importancia de reducir os quilos no contedor verde, ou xenérico, de cara a reducir a factura que lle cobra Sogama aos concellos, con métodos como a compostaxe que xa é unha realidade na correcta xestión de residuos de Camariñas. Os colexios valoraron moi positivamente os obradoiros e desexarían repetilos no vindeiro curso.

Precisamente no ámbito da compostaxe, o Concello de Camariñas iniciou hai xa máis dun ano unha serie de campañas para fomentar a elaboración de compost que ten como froito que máis de 100 familias están de reducindo os residuos depositados no contedor verde. Ante o éxito da iniciativa, o concello non descarta ampliala nun futuro.