Por un Centro de Educación Especial Público na Costa da Morte
Despois das crúas declaracións das familias e traballadoras afectadas polo peche do Centro de Educación Especial ASPABER, esta mañá de xoves desnevolvíase unha manifestación para denunciar a situación de desamparo na que quedan 20 alumn@s con Necesidades Educativas Especiais.
Ducias de familias participaron nesta demostración de que as cousas se poden facer doutro xeito. Moita veciñanza, que non tiña constancia da situación, achegouse e as familia afectadas “sentiron o apoio da xente”, como nos conta Sara Bajo, unha das nais afectadas.
Quen falou en público foi Carmen Blanch, representante das familias no Consello Escolar. Fíxoo cun discurso moi emotivo, deixando patente que “tiñamos un centro moi familiar, e que perdamos isto, para as familias é un golpe moi duro”. “É moi triste” sinalou Blanch, que volveu cargar duramente contra a xestión do peche por parte da Xunta Directiva da entidade sen ánimo de lucro. “Fumos utilizados como mero mecanismo para presionar a Consellería para conseguir un convenio mellor, e ao final deixáronnos abandonados como cans, sen contarnos nada, sen escoitarnos… cunha frialdade tremenda”.
Unha vez que as familia vén que o peche do centro é case seguro (malia que o propio Indalecio Cabana, Xefe Territorial da Consellería de Educación lles prometeu que estirará o prazo se dende a Xunta Directiva queren rectificar a decisión), teñen clara cal é a única saída posible: “A única saída que vemos viables a día de hoxe é que vaian todos xuntos a algún dos espazos que ofrece o Concello de Carballo, que poña ben grande no cartel Centro de Educación Especial Público na Costa da Morte”, dando conta de que a día de hoxe hai moitas familias de Carballo e Coristanco pero tamén ata de Cee.
Pasos a seguir
As familia aseguran que “non imos parar coas mobilizacións, e de feito imos comezar unha colleita de sinaturas polos concellos, ata Cee”. O que teñen claro é que non van pedir praza nos centros de ensino ordinarios. “So nen@s con grandes necesidades, polo que non poden ser atendidos ben polos centros ordinarios, que levano anos sufrindo recortes”, explican. “Necesitarían o que se chaman “Aulas Específicas”, con profesionais PT, AL… para cada 5 nen@s, pero a día de hoxe é inviable que a Consellería o garantice”
En calquera caso, a Consellería brindouse a coordinar unha xuntanza a partir da vindeira semana coas familias para analizar as posibles opcións.
Apoios
Ademais da reunión realizada onte co PSOE local, das iniciativas presentadas polo BNG, e do apoio constante da CIG, hoxe as familias tiveron tamén unha xuntanza con Xosé Regueira. O vicepresidente da Deputación, ofreceu toda a colaboración do ente provincial para chegar a unha solución temprana, “porque setembro está á volta da esquina”.
Ademais, outros colectivos como a Plataforma "Reiseñores" NEE/NEAE Costa da Morte quixeron amosar a súa “solidaridade e apoio ás familias afectadas. Esta decisión suporá ter que recolocar e espallar arredor de 20 alumnos con necesidades educativas especiais (NEE) noutros centros da comarca e/ou da Costa da Morte co conseguinte trastorno, de incalculábeis consecuencias, para o alumnado con necesidades educativas especiais”.
