Está a comarca de Bergantiños pendente de dous fortes incendios forestais. Dábanse en paralelo, a partir das 14:20h desta tarde de luns, un incendio na parroquia carballesa de Noicela e un en Caión, A Laracha.

Co paso das horas, os dous lumes uníronse nunha longa fronte de máis de 2km de lonxitude.

Pasadas ás 23:00h, as últimas estimacións provisionais indican que os lumes afectan unha superficie de 150 hectáreas, quedando estabilizado. Para a súa extinción mobilizáronse, polo de agora, 2 técnicos, 13 axentes, 16 brigadas, 14 motobombas, 1 pa, 3 unidades técnicas de apoio, 3 helicópteros e 4 avións, que estiveron atravesando a cidade da Coruña para coller auga na ría de Betanzos. 

Dende o Concello da Laracha, aseguran que se trata do segundo incendio rexistrado en Caión en poucos días, polo que se fai un chamamento á colaboración e á responsabilidade de toda a veciñanza para evitar que situacións como esta se volvan producir.

A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal.

Ademais, existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento: 900 815 085. Así mesmo, toda a información actualizada sobre incendios forestais que acadan as 20 hectáreas poderá ser consultada na conta aberta de X (antigo twitter): @incendios085.