O 12 de Xaneiro, día do nacemento do economista francés Serge Latouche, festéxase o Día Internacional polo Decrecento, que propón adoptar un estilo de vida máis sostible e equilibrado, reducindo a produción e o consumo, priorizando a calidade de vida, a xustiza social e a preservación dos ecosistemas.

Para festexalo, a Rede de Decrecemento de Carballo e comarca, que forman tanto persoas pertencentes á directiva coma socias do Casino, e que fai parte da Rede de Decrecemento do Eo-Navia, Galiza e O Bierzo, organiza este sábado 11, no Casino1889 de Carballo, unha xornada cun completísimo programa que vai dende as 11:00 da mañá ate ás 18:00 e que inclúe feira artesá, palestras e talleres sobre Decrecemento na que participarán conferenciantes de primeiro nivel, tanto de país coma de Estado e mesmo internacional, no ámbito do Decrecemento.

Ademais a xornada servirá para distribuir en formato físico, o fanzine "O Caracol" que xa fora presentado o pasado 31 de novembro, e do que intentaremos traer a QPC algún artigo. Haberá xantar comunitario no que cadaquén pode traer os seus petiscos para partillar e música ao vivo coas cantareiras Lagháchema. "Unha xornada de debate, aprendizaxe e diversión, tecendo rede e facendo comunidade", explican dende a Ree.

Programa

Os horarios e actividades serán as seguintes:

• 11:00h - Inicio da Feira de Artesanía
• 12:00h - Palestra: "Crise ecosocial e alternativa ecofeminista" con María Castelo e Begoña de Bernardo
• 14:00h - Sesión vermú co grupo Lagháchema
• 15:00h - Xantar comunitario
• 16:00h - Obradoiro: "Imaxinando un 2055 decrecentista" con Joam Evans
• 18:00h - Peche da xornada

Máis novas