Mércores. 24.04.2024
El tiempo

A CIG non asistirá á reunión convocada por Ferroatlántica por considerar que busca lexitimar a vendas das centrais

A CIG non asistirá á reunión convocada por Ferroatlántica por considerar que busca lexitimar a vendas das centrais
cig-venta-ferroatlantica A dirección de Ferroatlántica convocou unha xuntanza este xoves en Madrid co comité de empresa e coas centrais sindicais A CIG non asistirá a xuntanza convocada pola dirección de Ferroatlántica para este xoves en Madrid á que están chamadas os comités empresariais e as centrais sindicais. Alegan que non asistirán, tal e como o comunicou previamente, debido a que non se produciu ningunha mudanza na cuestión de fondo. "A empresa segue sostendo o seu ilegal plan industrial sobre a base da venda das centrais hidroeléctricas e a segregación das actividades", din dende a CIG. Para a CIG esta convocatoria é unha estratexia de Ferroatlántica coa que tenta buscar o apoio da representación social e lexitimar así o seu "ilegal proxecto", aparentando agora abrir a negociación dun acordo marco "para o desenvolvemento dun plan futuro de inversións e emprego nas empresas do grupo". "Mediante esa mesa, Ferroatlántica usurpa o único marco válido de discusión e decisión sobre os temas que atinxen ás concesións hidroeléctricas - as fábricas galegas da Costa da Morte - e busca substituír a ausencia nesas reunións dos auténticos protagonistas da negociación: o Comité de Cee-Dumbría-Centrais Hidroeléctricas", sinalan dende a central sindical. Asimismo, cren que a empresa considera insuficientes os acordos asinados cos comités dos distintos centros de traballo e por iso agora pretende acadar un pacto semellante "pero simulando un marco negociador en Madrid no que inclúe ás fábricas de Hidro Nito, FerroSolar e mesmo as minas de cuarzo, ocultando así o feito de que o Comité Cee-Dumbría non está presente". Acordo ilegal Ante esta situación, a CIG di que non vai participar "nesa artimaña" xa que teñen claro que o obxectivo desas reunións "é lexitimar coa representación social un acordo ilegal co que presionar a Xunta de Galiza para que modifique o interese público". "A CIG non será cómplice dun acordo que sabemos que é negativo para a comarca, todavez que a empresa xa ten un plan definido e pactado no que segue baseando as inversións e os proxectos industriais na venda das centrais hidroeléctricas", din dende o sindicato. Ao contrario,"a CIG fai súa a postura do Comité, así como recollemos e defendemos o clamor da comarca da Costa da Morte, que o pasado 10 de marzo saíu masivamente á rúa para rexeitar calquera tentativa de venda, consciente de que a única garantía de salvagardar o interese público e o emprego é manter vinculadas ambas actividades". Neste sentido, denuncian que tanto Ferroatlántica como a Xunta de Galicia - "quen co seu silencio continúa a dar azos á empresa", din os da CIG - están facendo caso omiso deste clamor cidadá. "E non podemos menos que lamentar que haxa organizacións sindicais que se presten a colaborar coa empresa nesta artimaña. Por iso, esixímoslle que respecten o sentir da Costa da Morte, manifestado o pasado 10 de marzo", din dende a CIG. Unha vez máis, a CIG pídelle á empresa que respecte este clamor, desista dunha vez de calquera futuro asentado na venda das centrais hidroeléctricas, e aposte por construír unhas novas e sólidas bases de entendemento de acordo aos desexos que teñen os cadros de persoal de Cee e Dumbría e, por extensión, á Costa da Morte. "Cada día que pasa, as actuacións e decisións de Ferroatlántica neste intenso e esgotador empeño por vender as centrais hidroeléctricas, reafirman a necesidade de manter e reforzar as posturas discrepantes contra destas intencións. Neste sentido, a dubidosa credibilidade desta empresa pódese exemplificar con tres feitos: o incumprimento de calquera inversión e modernización nas fábricas - nin tan sequera se construíu o formo 23 en Dumbría -; as verdadeiras consecuencias que supón a fusión con Globe; e o incumprimento das inversións anunciadas en setembro de 2016 en FerroSolar" din dende a CIG.

Artigos relacionados

Novas do #CasoFerroatlántica

  Fonte

Comentarios