Vai de Fogos na Xunqueira

Vai de Fogos na Xunqueira

14:19 16/08/17

Fogos da Xunqueira -Foto-Stoupa

Despois do comezo a golpe de lembranzas, as Festas da Xunqueira de Cee seguen completándose co arraigo habitual. Este mércores 16 péchanse as festas coa actuación de Rosana, pero o día grande sempre é o propio 15 de agosto, coa procesión e os fogos como grandes protagonistas.

A cita de martes arrincaba coa Procesión da Xunqueira polas rúas da vila. Ateigadas quedaban as rúas para recibir á súa patroa.

De seguido, a Alameda acollía o concerto, bailado, da Banda de Música Municipal. Non pasou desapercibida a sesión vermú e a verbena nocturna, pero a gran cita deste 15 de agosto sempre son os fogos da Xunqueira. Uns fogos que sempre xeran polémica polos 15.000€ que levan da partida dos 90.000€ de orzamento deste 2017. Uns fogos que, en todo caso, serven de punto de encontro para centos de veciños da comarca e de visitantes.

Algúns deles escolleron a novidosa proposta da tenda turística ceesa Stoupa de montar nos Cruceros Fisterra para velos fogos dende o mar. Foron máis de 50 persoas as que disfrutaron desa impresionante visión dos fogos retumbando no mar, e que xa obrigará aos organizadores a mantelo como proposta fixa cada verán.

Aquí vos deixamos cun vídeo de Rafa Quintáns, outro de Rubén Santamaría (que non falla co seu vídeo dende hai 8 anos!), e varias imaxes da festa: