Volveu a vida cultural a Cee cos actos arredor de Domingo Antonio de Andrade

Acto arredor dos Domingo Antonio de Andrade-Foto-Rafa Quintáns
Redacción
17 de xuño de 2020 (10:33 h.)

González Formoso destaca a contribución á arte galega de Domingo Antonio de Andrade, “un ceense universal” O presidente da Deputación asistiu hoxe en Cee ao homenaxe ao arquitecto, figura clave do barroco en Galicia, ao que se lle dedica o Día das Artes Galegas “Se o barroco ten un nome propio en Galicia é o de Domingo de Andrade”, afirmou o presidente da Deputación da Coruña, que destacou a impronta do arquitecto en boa parte da xeografía galega.

Arrincou onte o programa cultural do Concello de Cee arredor de Domingo Antonio de Andrade, aproveitando que a Real Academia de Belas de Artes lle dedica este ano o Día das Artes Galegas. Despois da ofrenda floral, tivo lugar un espectáculo Barrococó, Rilo&Penadique, para dar paso á inauguración, na sala de exposición da Casa da Cultura, da exposición “Domingo de Andrade, un arquitecto universal”.

Unha fermosa ocasión para retomar os actos culturais na vila da Xunqueira e celebrar o ano do “ceense universal”, unha das figuras máis importantes do barroco en Galicia.

A alcaldesa de Cee, Margarita Lamela, acompañou ao presidente da Real Academia Galega de Belas Artes, Manuel Quintana Martelo, e ao da Deputación, Valentín González Formoso na ofrenda floral fronte ao monolito.

Durante os discursos lembraron obras do arquitecto como a Torre da Berenguela da Catedral de Santiago “que durante séculos serviu co singular son das súas campás como un faro en terra para guiar aos peregrinos que completaban o seu camiño” ou as icónicas escaleiras de caracol de Santo Domingo de Bonaval, “que semellan flotar no aire e que, 320 anos despois da súa construción, seguen asombrando ao mundo pola súa beleza e virtuosismo técnico”.
E non esqueceron a sacristía e a sala capitular da Catedral de Lugo, a capela do Rosario no Mosteiro de Sobrado ou o retablo maior da Virxe da Barca de Muxía, que se perdeu no incendio do santuario en 2013.

O presidente da Deputación destacou o importante papel que desempeñou a vila de Cee para reivindicar a figura do que, xunto co fliántropo Fernando Blanco de Lema, é un dos seus fillos máis ilustres.

Máis actividades

Os días 19, 20 e 21 de xuño, ás 21.00 horas, hai un Ciclo de Conferencias no Auditorio Baldomero Cores da Casa de Cultura.
O venres 19, o arquitecto Juan Creus Andrade trae “Intensa destreza. Algunhas notas sobre a obra de Domingo Antonio de Andrade”.
O sábado 20, o profesor de xeografía e historia no I.E.S. de Sanxenxo, Antonio Leis Castro, falará sobre “o mestre do barroco galego.
E domingo 21, o propio Víctor M. Castiñeira, recuperará algúns Apuntes históricos sobre Andrade e a vila de Cee, que podedes ver na serie que aquí abaixo recollemos.

Novas relacionadas

Artigos de José Ramón Senra Rey

Especial Domingo Antonio de Andrade, por Víctor Castiñeira

Etiquetas
Cultura patrimonio historia arquitecto