Antón Recamán, un exercicio de poesía e fraternidade en Corcubión
A asociación Boca de Sapo organizou este pasado sábado algo máis que a presentación dun libro. A presentación no museo da Casa da Cultura de Apatria, o novo poemario de Antón Recamán, foi toda “unha declaración de fraternidade, unha rede onde tecer entre todas e todos para crear un mundo que sexa algo máis amábel, algo máis libre e algo máis humano”, como relata un dos organizadores, Alex López.
Chegaron desde Vigo, Branca Trigo e Alfredo Vázquez da editorial independente Malafera, coa disxuntivas do transporte público galego, como retranqueou o anfitrión, para este evento que comezou coa proxección do vídeo poema creado por KCH Visuals.
De seguido tomou a palabra Álex López cun percorrido polo universo poético do autor mesturando versos propios con versos de Mans Atlánticas da Ausencia, Alén do Corpo e o libro protagonista do acto Apatria.
Após Branca Trigo ler un fermoso e potente texto arredor de Apatria, o poeta Antón colle a palabra falándonos das feridas, das cicatrices e da dor que fixo que tivera a necesidade de escreber Apatria.
A xornada rematou cun pequeno recital do propio autor e cun brinde final cun viño como broche de ouro para rematar coa presentación de Apatria.
”Desde Boca de Sapo sentímonos moi contentos de que sigamos a tecer comunidade a través das potentes fotografías expostas e penduradas das paredes, da cultura, da fraternidade e da palabra. A nosa verdadeira Apatria”, conclúe López.
NOVAS RELACIONADAS
- Novembro 23: Xa está na rúa - Apatria - o novo poemario de Antón Recamán
- Abril 22: Antón Recamán reflexiona sobre o propio ser no seu segundo poemario “Alén do Corpo”:
- 2020: Antón Recamán: ““As mans atlánticas da ausencia” nace do silencio”.