Volve o eterno asunto do solar do cine vello de Corcubión á palestra da man da portavoz do PP de Corcubión, Gema Freire. Freire acusa ao actual alcalde de "tergiversar a realidade e de intentar confundir aos veciños cando culpa á Xunta de Galicia dos atrasos na aprobación definitiva da modificación da ficha do solar do Cine". A representante popular insta ao alcalde a que "informe da súa xestión neste asunto, así como tamén os documentos enviados ao goberno galego e os seus prazos de entrega". Neste sentido, Freire acusa ao actual alcalde de "ser o único responsable na demora da tramitación do solar do Cine".

Repaso

Tal e como informa a portavoz popular e candidata á Alcaldía, o 5 de febreiro de 2010 a Secretaría Xeral de Ordenación do Territorio e Urbanismo solicitáballe ao concello unha serie de deficiencias que ten que emendar. O 22 de abril, o concello remite á Xunta parte da documentación, polo que, un mes máis tarde, o 21 de maio, o goberno galego, solicítalle novamente que, nun prazo de seis meses, remítaselle o estudo económico financeiro, integrado ao proxecto de modificación, así como tamén o proxecto modificado resultante e todos os planos e documentos diligenciados pola secretaría do concello.

Freire informa de que, "nesta ocasión, o actual alcalde non enviou a documentación ata o límite do prazo, no mes de novembro", e que a pesar diso, "enviouna mal e a rastro", xa que segundo informou Freire, "o 15 de decembro a Xunta emite novamente outra notificación ao concello esixíndolle que envíe os expedientes solicitados": Informe da Administración do Estado en materia de Costas, dado que a modificación afecta a terreos situados parcialmente dentro da zona de servidume de protección de costas; Proxecto completo aprobado provisionalmente e diligenciado; Plano de cualificación de chans; O estudo económico non recolle os custos da obra urbanizadora precisa nin recollen que non se necesaria.

"Aquí o único que non está cumprindo co seu deber é o actual alcalde", sentencia Freire.

Novas relacionadas

• 21-12-10: O solar do Cine Vello de Corcubión non poderá acoller un edificio.
• 11-02-09: O BNG propón reubicar o mercado no antigo cine de Corcubión.
• 03-02-09: Novo paso para a recuperación da parcela do cine vello de Corcubión.
• 29-01-09: O concello de Corcubión inicia os trámites para recuperar o solar do cine vello.

Fonte

• Nota de prensa do PP de Corcubión.