www.carballoformacion.org. Así se chama a primeira Plataforma de Teleformación de Galicia xestionada por unha entidade municipal. O Concello de Carballo fixo pública o pasado venres a nova ferramenta, que permitirá ofertar cursos tanto a traballadores municipais, como á cidadanía en xeral e ao tecido empresarial carballés na modalidade online, para que cada quen poida aproveitar as accións formativas dende a súa casa ou dende calquera lugar que conte con conexión a Internet.

Estiveron na cita o Alcalde de Carballo, Evencio Ferrero; o Concelleiro de Promoción Económica, Xosé Regueira; e o responsable de varias das accións formativas que acollerá a plataforma, Carlos Parada.

Polo de pronto, Xa está dispoñible o primeiro curso titulado "Novas tecnoloxías para o emprendemento". Os interesados e interesadas en inscribirse poden facelo, de forma gratuíta, dende hoxe 7 de marzo e até o venres 14 do mesmo mes, a través de <www.carballoportaaberta.org> no apartado "Tramitar por Internet".
E proximamente ofertarase unha nova acción formativa, neste caso centrada na "Creación dun perfil profesional na web 2.0" e a finais de ano presentaranse dous cursos personalizados de seguridade informática e certificados dixitais destinados ao persoal do Concello e que máis tarde serán adaptados para todos os cidadáns.

Máis información

• www.carballoformacion.org.
• Carballo PortaAberta
• Ligazón para inscribirse no curso "Novas tecnoloxías para o emprendemento"

Fonte

• Concello de Carballo.