Falamos dun dos grandes puntos negros de naufraxios da Costa da Morte. As rochas do Reira, entre Camelle e o Cabo Vilán, por esa marabillosa pista de terra que une ambos puntos. Esta mañá, o lugar volvía amencer salpicado por unha mala nova. Unha gabarra encallaba nas rochas camariñás.

Trátase dunha gabarra que cargaba terra, sen tripulantes a bordo, que metres era levada por un remolcador que perdeu o control e acabou nas rochas.

Todo acontecía cando o buque West con 6 tripulantes a bordo (Antillas Holandesas), que estaba remolcando á gabarra Prima de 105 metros de eslora desde Odesa a Riga, alertou a última hora da tarde de onte a Salvamento Marítimo de que lle fallou o cabo de remolque cando se atopaba a 15 millas de Cabo Touriñán.
O West, de 40 metros de eslora, volveu dar remolque á gabarra sen éxito, xa que ás 01.02 horas de hoxe informou de que se rompeu o cabo de remolque e este enredouse na hélice, co que se atopaba.

O Centro de Coordinación de Salvamento Marítimo situado en Fisterra xa mobilizara ao Don Inda para asistir á gabarra que derivaba cara á costa. Desde o CCS en Finisterre optouse finalmente por prestarlle remolque ao West en aras de poñer a salvo aos 6 tripulantes, o que impediu finalmente remolcar tamén á gabarra.
As operacións resultaron complexas xa que era de noite e as condicións meteorolóxicas na zona eran adversas con ventos do Oeste forza 7 a 8 (51-74 km) e olas de 4 a 5 metros.

Poden ollar as boas fotos que botou Diego Alonso para camarinas.eu.

Novas relacionadas

• 12-12-13: Un pesqueiro de Fisterra encallou nas rochas do Ézaro.
• Por unha base loxística de Salvamento propia no porto refuxio de Brens.
• A Costa da Morte presente na nova Plataforma de Pesca Europea Artesanal LIFE.
• 150 quilos de percebe incautados en Malpica.
• De pecios ou tesouros submariños.
• Os mapas de naufraxios de Pepe de Oleghario. Uns verdadeiros tesouros.

Fonte

• Redacción de QPC ([email protected]).
• Nota de prensa de Salvamento Marítimo.