Seguen sendo os recortes duro cabalo de batalla para as familias de Laxe. Hai uns anos vímolos pelexando polo servizo de pediatría, e estes días están en pé de guerra por unha aula máis grande para a sección infantil do CPI Cabo da Area. Unha nova problemática coa educación no rural, esquecida dende sempre e sen apoios.

A problemática é que este ano en Laxe entran no centro 26 cativos en 4º de infantil, e dicir con 2 – 3 anos. Pero entran nunhas aulas preparadas para acoller como máximo a 20 alumnos. “Estamos no rural, e polo tanto non fan aulas grandes”, sinalan os pais e nais da ANPA, preocupados pola situación.

Uns pais que xa teñen falado con Fermín Granados, o inspector de Educación para esta zona, “quen nos atendeu pero sin resolvernos nada e remitíndonos ao Xefe Territorial Provincial, Indalecio Cabana. Levamos dúas semanas para que nos atenda, sen contestación pola súa parte, ata que nos derivou de novo ao propio Fermín”.

Non entenden a falta de interese das administracións despois de descubrir pola prensa que Indalecio estivo estes días por Cabana de Bergantiños e Carballo. “E sabendo a nosa problemática, porque tanto o inspector como as suas secretarias sabían o noso, nin sequera se dignou a visitarnos e ainda menos a darnos unha cita para atendernos, e sin solucionarnos nada por suposto”, critican.

Seguen en loita, con sinaturas colleitadas e enviadas cunha carta ao Inspector e ao Xefe Territorial, contando co apoio da Federación de Anpas da Costa da morte, do concello, e de todos os grupos políticos. “Pero de nada nos vale”, lamentan por agora os membros da ANPA.

Novas relacionadas

• Íntegro convertiu o cole de Laxe noutra Diversiescola.
• As Anpas Galegas conclúen en Vimianzo que hai que seguir mobilizándose polo ensino público e de calidade.
• A comunidade educativa, entre eles o CPI de Laxe, para ao completo contra a LOMCE.
• 2011: “Queremos pediatra tódolos días”.

Fonte

• Redacción de QPC (info@quepasanacosta.gal).