Arrinca hoxe luns o ambicioso programa das Festas do Mar de Malpica. Organizadas pola A.C. Mallas da Area, coa colaboración municipal, traen unha completa semana de actividades, que non rematarán ata o domingo 25.
Como dicimos, falamos dunhas festas singulares, que quere escapar da dictadura da verbena, e que busca outras actividades complementarias. Así, estes primeiros días de semana, teremos presentacións singulares, acompañadas de café e petiscos, as tres, na Casa do Pescador, a partir das 20:30 h.
Abrirán o telón este luns 18 Xosé Manuel Varela Varela e Icía Varela (pai e filla, naturais de Cerqueda) e Nerea Gómez, coa grandísima estrea do libro "Pandereteiras". Un libro que nace tralo éxito de "Cantareiras", nesa homenaxe nacional ás nosas tocadoras.
Para o martes, tócalle a outra autora da casa como Marta Villar, que vai falar do seu famoso "Detective Ferruchi".
Pechará esta primemira traca de accións o mércores o eterno Xurxo Souto co seu "Somos un pobo de artistas", unha oda a Luisa Villalta.
Ollo, que o xoves 21 hai prefestas, e o venres 22, Concurso de Barcanas e Castelos de area.