Delimitarase unha zona de tráfico e reforzarase a seguridade dos usuarios A Consellería do Mar, a través do ente público Portos de Galicia, investirá máis de 58.000 euros en diversas melloras no peirao de Camariñas. Así o comunicou onte o presidente de Portos de Galicia, José Juan Durán, nunha visita á zona. O obxectivo destas obras é mellorar as condicións de traballo e reforzar a seguridade dos usuarios e para iso decidiuse delimitar unha zona de tráfico e acotar e distribuír a explanada de traballo. Así, a Consellería do Mar vén de dar comezo aos traballos de delimitación e pavimentación dun novo vial portuario duns 200 metros na zona próxima aos departamentos, eliminando así o tráfico do resto da zona de traballo. Ademais habilitarase unha zona de varada de máis de 750 metros cadrados cun peche en tres das súas caras, permitindo tamén separar as augas de escorrentía exteriores. Na parte frontal, que será a que non se peche, colocarase un badén de formigón para recoller estas augas. Finalmente pavimentaranse tamén uns 1.200 metros cadrados de zonas co firme deteriorado nas proximidades da lonxa, seguindo solicitude da confraría. Así mesmo, crearase unha pequena caseta na que gardar ferramenta e na que se ubicarán as tomas de auga e electricidade.

Novas relacionadas

• 2014: O porto deportivo de Camariñas aumento as visitas nun 20%
• 2013: O Porto de Camariñas liderou con 773 barcos atracados no 2013 os tránsitos en Galicia.

Fonte

• Redacción de QPC ([email protected]).
• Consellería do Mar