Non hai nin un mes que un temporal deixaba un falecido na Costa da Morte. Afortunadamente parece que desta volta non hai que lamentar tanto tralo paso desta nova “Cicloxénese explosiva” chamada "Gong".

Como datos, ademais de chover sen parar durante día e medio (o domingo chegou a calma), o vento virou ó norte a primeira hora do sábado deixando refachos de vento de 149 km/h en Fisterra, 130 en Vimianzo, 111 en Coristanco ou 107 en Camariñas.

E lamentablemente "a vindeira semana continuará o tempo húmido e chuvioso con lixeiro aumento das temperaturas cara a fin de semana", segundo nos contan os compañeiros de Meteogalicia.

Estampas

Ao longo deste sábado 20 de xaneiro de 2013 vivíronse estampas complicadas. Como a de Salto, en Vimianzo. Xa é habitual que os campos de millo desta zona estean inundados durante o inverno, pero onte semellaban auténticos campos de arroz. Ademais, na zona de Baio o río Grande estaba completamente desbordado e de punta a punta, dende a Carballeira ata o final da Piroga, a auga cubría leiras enteiras.

Durante este fin de semana o vento tamén provocou serios desperfectos no entorno do edificio da escola do CEIP Os Muíños, en Muxía. No piñeiral que está no recinto do colexio, un piñeiro de considerables dimensións foi arrincado levando por diante outras tres árbores pequenas e derrubando un muro que separa o solar do concello onde se atopa o edificio de obras, así como a farola que o ilumina.

Os campos de fútbol tamén sufriron. De feito, no Pino do Val o vento levou parte do teito de uralita das bancadas do campo Pedra de Ouro, e fixo suspenderse ata 17 partidos en toda a fin de semana no fútbol da Costa.

Pero claro, tamén deixou estampas agradables, como a mellor cara da Fervenza do Ézaro.

Novas relacionadas

• Ciencia e Tecnoloxía, con Mario Rodríguez Gómez: “Cicloxénese explosiva”.
• 14-12-13: O temporal sacude á Costa cun falecido.
• 16-10-12: O temporal atiza o vento e rompe muros.
• 26-10-12: Chegou o temporal.
• Temporal Novembro 2010: Máis imaxes do mar salvaxe na Costa da Morte durante o temporal.
• Temporal febreiro 2010: As primeiras imaxes do Xynthia na Costa da Morte.
• Estudio do Centro Fonteboa Na Costa da Morte chove máis dun tercio dos días.

Fonte

• Redacción de QPC ([email protected]).