Esta vindeira fin de semana terá lugar en Mazaricos unha das citas máis esperadas do ano, a Romaxe de Coiro. Como nos conta Ismael Caamaño, da A.C. Xuventude de Coiro, falamos dunha festa senlleira, e que pode remontarse séculos atrás. E máis alá do verbeneiro programa de festas, analizamos o seu pasado.

A primeira nota data do 1463, data que aparece en números romanos no arco do pórtico da propia capela da Romaxe, a Capela de Nosa Señora do Monte, e que fai pensar que esa foi a data de construción da mesma. Xa hai documentos asinados polo Reitor de Santa María de Coiro de 1614, e aló polo 1640 xa se crea un hospital de peregrinos para aqueles que facían o seu camiño ata Fisterra.

O pórtico, de 1681, feito polo canteiro Gregorio de Cornes, foi arrasado por un incendio no 1691. Recupérase e polos séculos XVIII e XIX hai constancia de importantes visitas, antes mesmo de que un novo raio destroce de novo a ermida.

Xa no 1941 hai constancia da romaría da Romaxe. Os veciños de Suevos, turnándose cada ano, toman a organización, coa obriga de render contas o primieor domingo de setembro ante o cura. A Romaxe xa é toda unha realidade.

A partir de aí acontecen cousas como un intento de roubo na capela aló polo 1988 que aínda lembran moitos veciños do lugar, e que obrigan a unha nova reforma, inaugurada en 1995. Só 3 anos despois, a parroquia celebra o 300 aniversario da amplicación da ermida.

A Festa

Tal e como se entende a día de hoxe, as festas da Virxe do Monte da Romaxe de Coiro celébrase dende 1999, e para estes sábado 24 e domingo 25 de agosto hai preparadas unha morea de cousas. O sábado toca procesión maturuna, misa e comida popilar, para unha tarde de ruta cabalar, cea e disco móbil. Para o domingo, procesión, e sesión vermú e festa ata a noite. Pero teñen todo o programa na axenda:

• AxendaCostadaMorte: Programa da Romaxe de Coiro.

Fonte

• Redacción de QPC (info@quepasanacosta.gal).
• Fotos de savonarolamiscelanea.